Ыйааһыны хонтуруоллуур пууну атын сиргэ көһөрөргө

Нам айан суолугар улахан уйуктаах массыыналар ыйааһыны хонтуруоллуур пууну тумнан ааһаллар. Бу туһунан нэһилиэнньэттэн үҥсүү киирэрэ үгүс.

Куорат уопсай планеркатыгар улахан уйуктаах тиэхиньикэ сырыытыгар сыһыаннаах сытыы боппуруос турда. Ол курдук, Уопсастыбаннай палаата бэрэссэдээтэлэ Андрей Высоких эппитинэн, Киллэм карьерыттан кумах тиэйэр суоппардар, ыйааһыны хонтуруоллуур пууну тумнан, “Севернэй” түөлбэнэн уонна Жатайынан ааһа тураллар.

Маныаха куорат баһылыга Евгений Григорьев ыйааһыны хонтуруоллуур пууну атын сиргэ көһөрөр уонна ыстараабы кытаатыннарар туһунан этии киллэрдэ.

«ГАИ эрэ өттүттэн миэрэ ылыллара тутах, оннооҕор кытаанах дьаһал ылыллыах тустаах. Куораттааҕы Тупсаҕайдык дьаһанан олоруу быраабылатынан эмиэ эппиэккэ тардыахха наада. Ыстараап кээмэйэ бүгүҥҥү курдук 500 солк. буолбакка, 5 тыһ. солк. саҕаланыахтаах», – диэтэ Евгений Григорьев.  

Куорат баһылыга иһитиннэрбитинэн, ыйааһыны хонтуруоллуур пууну көһөрүү үлэтэ «СӨ суолларын управлениета» судаарыстыбаннай хааһына тэрилтэтин кытта ыытыллар.

Хаартыска: эрэдээксийэ архыыбыттан