Ый Кыыһа буоларым ыраах эбит...

Төһө даҕаны Ый Кыыһа диэн ааттанан бүппүтүн иһин, кинини күн бүгүҥҥэ диэри ити аатынан билинээччи элбэх. Оттон, чахчы, эчикийэ, бэйэтэ даҕаны туналыйан түһэн, хараҥаны сырдатар маҥан эбээт! Ити хайдах күн барахсан кыратык даҕаны көрө түспэтэ эбитэ буолла? Дьэ, дьикти! Сорох киһи саас, сайын таһырдьа быгыа эрэ кэрэх, эҕирийиэх бэтэрээ өттүгэр хараарбытынан барар. Ханнык даҕаны тоналка, пуудара абыраабат, син онон-манан соттубута, бистибитэ буолабын ээ.

Аны, сэгээр, Варябыт, били, этэргэ дылы, таҥас бүтэй талба-нарын тамана көстөр, эт бүтэй уҥуоҕа туртайар, уҥуох бүтэй силиитэ дьэҥкэрэр. Иннигэр икки оҕо ийэтэ, ыал эбэтэ тахсан турар диэбэккин. Синньигэһиин, эчикийэ, нарынын, фарфор куукула курдук! “Өстүөпэтэ барахсан хайдах тутара-хабара, кууһара буолуой?” – диэн аһынааччылар кытта бааллара.

Чахчыта, сорох киһи сиэбитэ-аһаабыта курдары көстө сылдьаахтыыр ээ. УЗИ да наадата суохха дылы. Һэ-һэ. Ити мааҕын сарсыарда сиэбит ыһаарыламмыт сымыытым, арыылаах килиэбим, баһа-баһа сиэбит барыанньам... Эбиэккэ иҥсэлээхтик испит хоргуннаах мииним, ону кытта кимириппит сыалаах этим, онно топпокко эбиммит бэчиэнньэм, баахылам...      

Таҥаһа-саба маанытын, сиэдэрэйин этэ да барбаккын. Биир кэм күлүмүрдээн, кылабачыйан олорор, хамсаннаҕын аайы мэктиэтигэр хараҕыҥ саатарга дылы!

Чэ, ити курдук сөбүлүүр ырыаһыппыт урукку-хойукку хиттэрин  астына-дуоһуйа иһиттибит, ытыспыт хабыллыар диэри таһынныбыт...

Дьиэбэр кэлэн утуйа сатаатым, уум кэлэн быстыбата. Харахпын симнэҕим аайы Ый Кыыһа бу туналыйан турар, сырдык ньуура ыйы санатар. Дьэ, ол сытан сарсыҥҥыттан күүскэ ырарга быһаарынным! 

Сарсыарда ойон тураат, мэлдьи буоларыныы, остуолум диэки ойдум. Сонно тута илиим арыыга уонна килиэпкэ баран иһэн, хата, бэрт маладьыаһыҥ, бэйэтэ тохтоото. Онтон сөбүлээн сиир сымыыппын үгэспинэн ыһаарылаабакка, бүтэйдии буһарынным. Мас арыытыгар сырдьыгынатан ылар түргэнэ үчүгэй даҕаны этэ. Соччо топпотум, онон сылбархай ууну киллиргэттим. Чэ, син уҥа-хаҥас тулуктаһар инибин. Өссө эн этэҕин, сэрээккэлээбитэ буоллум ээ! Онуоха куоскам “Ити аата хайыыгын? диэн ыйытардыы көрдө уонна хаһан бүтүөхпэр диэри өрө эккириирбин, тиритэ-хорута хамсанарбын одуулуу сытта.  

Ити күнү быһа сөптөөх аһааһын туһунан түүлбэр киириэр диэри элбэҕи аахтым. Быыспар-арыппар сирэйбин сырдатар норуот ньымаларын аахтым.

Эбиэппэр ханан да сыа сыстыбатах куурусса этин мүлүктээтим, грецкэй эриэхэни эбинним. Түөртүүр саҕана испин күөх дьаабылыканан албыннаатым. Онно топпокко, куртаҕым барахсан киэһээҥҥэ диэри тохтоло суох курулаата. Сөп ээ, соһуйдаҕа дии.

Киэһэ ууга буспут гречканы кытары күөх салааты кэбиммитэ буоллум. Айахпар нэһиилэ киирдэ. Утуйуом иннинэ уп-убаҕас, эмиэ астыга суох суораты истим. Астыммакка, атаҕым буолуохсут хаста да холодильник диэки баран истэҕинэ, кыл мүччү атын сиргэ халыйдым...

Сарсыныгар оҕом оскуолатыгар күһүҥҥү дьаарбаҥка ыытылынна. Дьэ, доҕор, онно саха саныыр-санаабат аһа-үөлэ барыта баара! Сонно тута Ый Кыыһын туһунан таһыччы умнуллаахтаата. Ымсыыра көрбүппүн барытын харбыаластым быһыылаах. Булбуппун-талбыппын харса суох дьиэбиттэн илдьэ кэлбит бакыаттарбар биир-биир хаалаан истим. Бэйэм да билбэппинэн, арай биирдэ өйдөммүтүм, үс бакыатым тобус-толору буолбут. Илии тутуурдаах, өттүк харалаах киһи сиэринэн үөрэ-көтө дьиэлээтим.

Доҕоор, онтон тиийэн остуолга биир-биир уурталаатым ээ: икки көрүҥ бөрүөк, сакалааттаах уонна эттээх блины, быар торда, үс куһуок пицца, түөрт бэрэски, тиэстэҕэ сууламмыт сосискалар, үс капкейк, икки пончик, ол быыһыгар моркуоп (һэ-һэ, били ПП туһунан син долоҕойбор туох эрэ хаалаахтаатаҕа). Хаартыскаҕа көрүҥ, ымсыырыҥ. 

Ити киэһэ дьоро киэһэ буолла, дьиэлээхтэрбин кытта астына-дуоһуйа, тото-хана аһаатыбыт.

Киэһэ утуйаары сытан бэйэбин уоскутуннум: чэ, Ый Кыыһа буоларым ыраах эбит. Кини курдук сыанаҕа тахсан сулустуу суһумнуурум саарбах. Ый Кыыһа, эн кэрэҕин! Ол эрээри, кэбис, мин хайдах баарбынан сылдьыбытым көнө эбит диэн түмүккэ кэллим!