Юрий Трутнев күргэ тутуутун билистэ

РФ Бырабыыталыстыбатын бэрэссэдээтэлин солбуйааччы, Уһук Илин федеральнай уокурукка РФ Бэрэсидьиэнин боломуочуйалаах бэрэстэбиитэлэ Юрий Трутнев, Саха сиригэр оробуочай сырыытынан кэлэ сылдьан, СӨ Ил Дархана Айсен Николаевы кытта Өлүөнэ муостатын тутуу хайдах бара турарын көрдүлэр.

Санатар буоллахха, Өлүөнэ өрүһү туоруур күргэни тутуу Дьокуускай куорат маастар-былаанынан ыытыллар. Оттон РФ Бэрэсидьиэнэ Владимир Путин бу эрэгийиэн олохтоохторун олохторун тупсарарга, табыгастаах эйгэни тэрийэргэ ылыллыбыт Уһук Илин куораттарын маастар-былааннарын бигэргэтэн турар. Юрий Петрович бу сырыытыгар маны бэлиэтээн туран: «Маастар-былааннар – бу стратегия буолар, биһиги ону тутуһар эбээһинэстээхпит. Ону таһынан, Өлүөнэ муостата – экэнэмиичэскэй интеграцияны хааччыйар бырайыак. Ороскуотун сабынар болдьоҕо – 15-20 сыл. Маннык улахан инфраструктурнай эбийиэккэ бу сөптөөх үлэ болдьоҕо», – диэтэ.

Билиҥҥитэ өрүс икки кытылыгар киэҥ далааһыннаах үлэ барар, онно 300-тэн тахса исписэлиис уонна 90 тиэхиньикэ үлэлиир. Тутуу суукканы толору барар. 2025 сыл бүтүөр диэри тутааччылар Өлүөнэ муостатын 11 миэтэрэ үрдүктээх бастакы тирэҕин – хаҥас кытыл эстакадатын кытыы тирэҕин – туруоруохтаахтар. Бу тирэх 18 сыбаайаҕа турар.

Хаартыска: СӨ Ил Дархана Айсен Николаев тг-ханаалыттан