«Юнармия» – эр санаа оскуолата

Кэнники 5 сылга киин куоракка «Юнармия» кэккэтэ 12 бүк эбиллибит. 2021 сыллаахха юнармеец ахсаана 298 эбит буоллаҕына, бүгүҥҥү туругунан – 3681 киһи. Хамсааһыны куорат 32 оскуолата хаҥатар, барыта 81 этэрээт үлэлиир.

Дьокуускайга 2022 сыллаахха аһыллыбыт «Юнармия» дьиэтэ Бүтүн Арассыыйатааҕы «Юнармия бастыҥ дьиэтэ» күрэххэ кыайыылаах аатын иккитэ сүкпүтэ элбэҕи этэр. «Юнармия» этэрээттэрэ федеральнай уонна эрэгийиэннээҕи куонкурустарга ситиһиилээхтик кытталлар.

Киин куорат баһылыга Евгений Григорьев бу бэлиэ күнүнэн «Юнармия» хамсааһын салайааччыларын, этэрээттэр хамандыырдарын, уһуйааччылары, быраабы араҥаччылыыр уорганнар бэтэрээннэрин уонна үлэһиттэрин, юнармеецтары уонна кинилэр төрөппүттэрин эҕэрдэлээтэ, махталын биллэрдэ. Кини «Юнармия» бу сыллар тухары дойду дьиҥнээх патриоттарын иитэн таһаарар эр санаа оскуолата, иллээх-эйэлээх улахан дьиэ кэргэн буолбутун бэлиэтээтэ.

«Кинилэри көрөн, биһиги куораппыт, өрөспүүбүлүкэбит, дойдубут инникилээҕэр бигэ эрэнэбит», – диэтэ куорат баһылыга.