«Ытык Сир»: сыыппара алыптаах сабыдыалынан

Ол туһунан хаһыаппыт дьоруойа, Арассыыйа худуоһунньуктарын сойууһун чилиэнэ скульптор Дмитрий Постников маннык кэпсээтэ:

- «Ытык сир» бырайыак сахалар сүгүрүйэр 9 сыыппаралара эргийэр алыптаах сабыдыалынан тутулунна. Ол курдук сыл 9-с ыйыгар, ый 9-с күнүгэр быйылгы сыл сыыппараларын холбуу эптэххэ эмиэ 9 чыыһыла тахсар дьикти күнүгэр, уонна икки ый үлэлэнэн, сэтинньи 9 күнүгэр түмүктэннэ.

Саха итэҕэлигэр олоҕурар тутууга барыта 18 уус үлэлээтэ. Тутуу ааптарынан ытык киһибит Афанасий Федоров буолар. Кини өр сыллаах баҕа санаата норуот өйөбүлүнэн олоххо киирдэ. Ол курдук скульптор Николай Чоччасов, уус Егор Степанов үс ини биилэриниин, дэгиттэр уустар Герасим, Дмитрий Максимовтар, тимир ууһа Николай Михайлов, уустар Николай Колодезников, Алексей Капитонов уо.д.а. үлэлэстилэр. Ону тэҥэ бырааттыы Монголия өрөспүүбүлүкэтиттэн маастардар кылгас кэмҥэ үлэлэһэн барбыттара.

«Ытык Сир» тутуута түмүктэммэт. Салгыы балаҕан тутуута уо.д.а. сиэри-туому ыытыыга аналлаах үгэс оҥоһуулара барыахтара. Ол барыта Кыайыы пааркатын кытта биир ситим буолуохтаах».

Норуот өйөбүлүн ылбыт бырайыагы Дьокуускай баһылыга Евгений Григорьев, кылаабынай архитектор Семен Сергеев бэйэлэринэн өйөөн туттарбыттара. Инникитин ситэрии үлэтин өйүүллэрин  эппиттэрэ куорат олохтоохторун барыбытын үөрдэр.

Оттон «Ытык Сири» көрүү-харайыы Гагаринскай уокурукка сыһыарылынна. Кырдьыга даҕаны, ааттыын Ытык сирбит итэҕэлбитигэр олоҕурар сиэри-туому ыытар ытык миэстэ буолуоҕа".