Ыстараап үрдээтэ, эппиэтинэс да улаатта!

Холобур, Собуот оҥорон таһаарыаҕыттан массыынаҕа бэлиэр баар киһи олорор миэстэтин (посадочное место) ахсааныттан элбэх киһини олордон айанныыр бобуллар. Биир да киһинэн ордук пассажиры ылыллыа суохтаах. Көлө хас миэстэлээх гына оҥоһуллубута хас биирдии тимир көлө пааспарыгар суруллар (атыннык эттэххэ, ПТС-ка суруллубут буолар).
Миэстэни таһынан пассажиры олордуу иһин көрүллэр ыстараап улаатта:
Биир ордук айанньыт (улахан киһи) аайы —  500 солк. төлүүгүн. Аны, ол киһиҥ тимир көлөнөн айаннааччыга анаммыт массыына курун иилиммэтэҕин быһыытынан, ити суумаҕар өссө 1000 солк. эбии ыстарааптанаҕын.
Оттон олбох ахсаанын таһынан улахан киһини буолбакка, эбиитин оҕону олордо сылдьан түбэстэххэ, ити ыстараабыҥ букатын да 3000 солк. буола үрдүүр!

Манна даҕатан эттэххэ, оҕо хайаан даҕаны массыынанан айанныырга анаан оҥоһуллубут кириэһилэлээх буолуохтаах. Ону толорботоххо, эмиэ ыстараап көрүллэр.
Ол курдук, саҥа сокуоҥҥа олоҕуран, ааспыт сыл ахсынньы 27 күнүттэн саҕалаан, оҕону анал кириэһилэтэ суох айаннатыы иһин суоппар 5000 солк. ыстарааптанар буолла.
Оттон ити ыстарааптанар тимир көлө тэрилтэ массыыната буоллаҕына, юридическай сирэй 200 тыһ. солк. ыстараабы сүгэр, тэрилтэ дуоһунастаах сирэйэ 50 тыһ. солк. төлүүргэ күһэллэр.
Бу иннинэ, тэҥнээн көрүҥ, биирдиилээн дьон (физлицо) ыстарааба 3 тыһ. солк этэ, дуоһунастаах сирэй киэнэ — 25 тыһ. солк., тэрилтэ 100 тыһ. солк. төлөһөрө.
Болҕой: Маныаха бэйэ дьарыктаах (самозанятай) быһыытынан дьону таһар суоппардар дуоһунастаах сирэй курдук үгүөрү ыстараапка түбэһэллэр. Ол аата, самозанятай киһи эппиэтинэһэ көннөрү киһи  киэниттэн үрдээн биэрбит.
Оттон ИПлар — юридическай сирэйгэ, о.э. тэрилтэҕэ тэҥнэнэн, ыстарааптарын кээмэйэ эмиэ биллэ үрдүүр буолбут.
Онон массыынанан дьону таһааччы тутуһуохтаах быраабылатын кэспэтэх көнө.