Ырарга турунуохха!

Уһун кыһыҥҥы күннэргэ, саҥа дьыллааҕы өрөбүллэргэ хаһааммыт сыабытын, хаһабытын аччатар туһунан толкуйдуур кэм оруобуна баччаларга саҕаланар.

Сааскы чараас таҥаһы кэтээри, муодунай кууркаларга батаары, ону баттаспытынан сайыммыт да чугаһаан ырар туһунан толкуйдуур кэммит кэллэ ээ, кыргыттар!

10.000 хардыы туһунан киһи аймах бары да билэбит, ол гынан ону күн аайы хаамар киһи аҕыйахпыт. Аҕыйах диэбэккэ, аҕыйахпыт диэтим, онно ити бэйэбин эмиэ киллэрэбин.

Оттон кэнники кэмҥэ сорохтор дьиэлэригэр олорон эрэ үлэлииллэр, хонтуораҕа да үгүс киһи хамсаабакка хам сыстан күнү-күннүктээн олорор. Онуоха, бу хаамыыны сатаан оҥорор кыаҕа суох дьоҥҥо, чуолаан сүрэҕэ суохтарга 6 сүбэ биэрэбит.

Хаамыы туһата

Хаамыы — бу бэйэ быһыытын-таһаатын тута сылдьарга, сүһүөхтэргин ноҕоруускалаабакка уонна настарыанньаҕын үрдэтэргэ олус үчүгэй ньыма. Ол эрээри сороҕор күн-дьыл эбэтэр дьиэтээҕи дьыалалар мэһэйдээннэр уулуссаҕа сатаан тахсыбаккын. Онуоха хомойумаҥ – 10 000 хардыыны дьиэттэн тахсыбакка оҥоруохха сөп.

1. Эрчиллиини таптыыр дьарыккын кытары холбоо
Холобур, киинэ, сериал, эбэтэр тэлэбиисэргэ сөбүлүүр биэриини көрөргөр биир сиргэ хааман 4-тэн 6 тыһыынчаҕа диэри хардыыны бэрт чэпчэкитик оҥоруоххун сөп. Оттон уустугурдар буоллахха, хомуллар сүүрэр суолу туһаныахха сөп, бу элбэх миэстэни ылбат.

2. Кирилиэс устун хаамп

Өскөтүн дьиэҕэр кирилиэс баар буоллаҕына, ону тренажер быһыытынан туһан. Кини атаххар, сискэр, көнөтүк тутта сылдьаргар олох бастыҥ ноҕорууска. Кыбартыыраҕа олорор буоллаххына, аэробнай степ-платформа ылан дьарыктаныаххын сөп.

3. Хаама сылдьан төлөпүөнүнэн кэпсэт

Төлөпүөнүнэн кэпсэтиини хаамыыга көһөр. Хостор икки ардыларыгар эбэтэр үлэ остуолун тула күүлэйдээһин кэмигэр хас да тыһыынча хаамыыны чаас аҥаарыгар чэпчэкитик оҥоруоххун сөп.

4. Миэстэҕин оҥоһун

Астына фитнестииргэр, хаамаргар миэстэҕин бэйэҥ сөбүлүүргүнэн тэрий: чүмэчитэ умат, таптыыр муусукаҕын холбоо уонна астына эрчилин. Бу сыал оҥостубут хардыыгын ыларга эрэ көмөлөһүө суоҕа, ону таһынан дьарыккыттан астыныыны, дуоһуйууну ылыаҥ.

5. Дьиэҥ үлэтин дьарыкка кубулут
Дьиэни-уоту хомуйууну уонна дьиэтээҕи үлэлэри актыыбынай, көхтөөх гыныахха сөп. Төҥкөйүү оннугар олорон ылыы (приседание) эбэтэр илиигэр, атаххар туох эрэ ыараханы иилинэ сылдьыы ноҕоруусканы улаатыннарарга көмөлөһүөхтэрэ, бириэмэҕин да харыстыахтара.

6. Умнубат гына будильнигы туһан

Ойон туран хамсаныахтааххын сотору-сотору умнар буоллаххына, хас да будильнигы күн устата эрчиллэргин санатар гына кэмигэр туруор, күүлэйдииргэ эбэтэр сынньанарга тохтобуллары оҥорорго. Бу хардыы ахсаанын элбэтэргэ эрэ буолбакка, бэйэ туругун тута сылдьарга көмөлөһөр.

Ити үөһэ этиллибит боростуой соруктары толордоххуна, дьиэҕэ да олорон сыалгын-соруккун бэрт чэпчэкитик ситиһиэҥ!