“Ыраас Арктика” бырайыак быйылгы сезонун арыйда

“МУУС УСТАР” ыччат бэстибээлин чэрчитинэн ыытыллыбыт быйылгы үбүлүөйдээх 5-с сезон официальнай арыллыытыгар Ил Дархан Айсен Николаев сырытта. Кинилэр “Ыраас Арктика” АНО бырайыактыыр офиһын салайааччыт Андрей Нагибинныын бэлиэ кэм саҕаланыытын кэрэһилиир күөх кнопканы баттаатылар.
“Ыраас Арктика”диэн – экология хамсааһына. Быйыл Саха сирин 6 оройуонун хабыаҕа. Уһун кэм усталарыгар мунньуллубут, дьэбин буолбут эргэ суудуналартан саҕалаан быраҕыллыбыт былаастыкка тиийэ ыраастыахтара. Ил Дархан бу үлэҕэ Арассыыйа араас муннуктарыттан волонтердар кэлэн үлэлэһэллэрин, кинилэри кытта көрсүһэрин эттэ. “100-200 киһи туох улаханы оҥоруохтарай диэххэ сөп эрээри, манна сүрүнэ – кинилэр дьон-сэргэ санаатыгар уларыйыыны киллэрэн, ийэ айылҕаҕа эппиэтинэстээх сыһыан үөскүүрүгэр көмөлөһөллөрө буолар”, – диэтэ. Тэрээһин бэстибээл “Саха сирэ – эн модун санааҥ күүһэ” треккэ киирсэр.
Бу күннэргэ Дьокуускайга “Янолово” хампаанньа Усуйаана Сайылык бөһүөлэгиттэн 60 т тимири аҕалан, тимир базатыгар туттарда. Бу туһунан Арктика сайдыытын уонна хотугу норуоттар дьыалаларыгар миниистир солбуйааччыта Сергей Неустроев иһитиннэрдэ. Кэнэҕэһин бу хамсааһын Саха сирин 13 арктикатааҕы улууһун тилэри хабыахтаах. Бу иннинэ Анаабыр, Булуҥ, Үөһээ Дьааҥы, Эдьигээн уонна Усуйаана улуустарыгар ыытыллыбыта. “Ыраас Арктика” бырайыак волонтердарын бөлөҕүн салайааччыта Анастасия Фатерина эппитинэн, быйылгы тэрээһин киэҥ хабааннаныа. “Карелия өрөспүүбүлүкэтиттэн саҕалаан, Чукоткаҕа тиийэ Арктика бары субъектарыгар тиийиэхпит”, – диэн, ССТА-ҕа иһитиннэрдэ.

Хаартыска: “МУУС УСТАР” бэстибээл официальнай Тг-каналыттан.