Йошкар-Олаҕа «Илиир Хоруолу» иһийэн олорон көрдүлэр

«Большие гастроли» федеральнай бырагыраама чэрчитинэн ыытыллар гастроллар Марий Эл Өрөспүүбүлүкэтин Йошкар-Ола куоратыттан саҕаланнылар.

Бэҕэһээ, сэтинньи 14 күнүгэр, Саха тыйаатырын артыыстара М. Шкетан аатынан Марийскай драмтыйаатыр сценатыгар Арассыыйа норуодунай артыыһа, биллиилээх режиссер Андрей Борисов туруоруутугар Улуу Шекспир өлбөт-сүппэт айымньытынан «Илиир Хоруол» испэктээги көрдөрдүлэр.

Марий Эл Өрөспүүбүлүкэтин култуураҕа миниистирин бэчээт уонна төрүт омуктар дьыалаларыгар солбуйааччы Михаил Матвеев: «Түөрт төгүл «Кыһыл көмүс мааска» бириэмийэ лауреатын аатын ылбыт, аан дойдуну тилийэ кэрийбит Саха академическай тыйаатыра улахан гостуруолун биһиги куораппытыттан саҕалаабыта биһиэхэ улахан суолталаах», – диэн бэлиэтээтэ.  

Саха тыйаатырын дириэктэрэ СӨ үтүөлээх артыыһа Петр Макаров М.Шкетан аатынан Марийскай драмтыйаатыр дириэктэрэ Эрик Юзыкайнҥа Арассыыйа норуоттарын доҕордоһууларын кэрэһилиир Саха тыйаатырын гостуруолларын өйдүү-саныы сылдьалларыгар тойон чороону туттарда.

Тохтобул кэмигэр Саха тыйаатырын дьоно испэктээкили көрө кэлбит Йошкар-Ола олохтоохторугар уонна ыалдьыттарыгар норуоппут төрүт оонньууларын кытары билсиһиннэрэн хабылыгы, хаамысканы оонньоттулар, итиэннэ саха төрүт аһынан күндүлээтилэр.

Судаарыстыбаннай бириэмийэ лауреата буолбут «Илиир Хоруол» испэктээк толору саала көрөөччүнү муста. Татарстан, Марий Эл куораттарыгар олохсуйбут биир дойдулаахтарбыт кэлэн төрөөбүт тылларынан испэктээк көрөн үөрэн, долгуйан бардылар. Оттон Саха тыйаатырын кытары аан маҥнай билсиһэр көрөөччүлэр иһийэн, болҕойон олорон көрдүлэр.   

Михаил Васютин Марий Эл Өрөспүүбүлүкэтин Судаарыстыбаннай Мунньаҕын бэрэссэдээтэлэ:

- Элбэх норуот сомоҕолоһон олорор киэҥ нэлэмэн Арассыыйа национальнай тыйаатырдарыттан биир ытыктанар кырдьаҕас тыйаатыр ыраах Саха сириттэн биһиэхэ гостуруоллуу кэлбитэ улахан суолталаах. Биһиги өрөспүүбүлүкэбит нэһилиэнньэтэ тыйаатыры таптыыр, онон саха эпоһын - Олоҥхону, Арассыыйаҕа  эрэ буолбакка, тас дойдуларга кытары бэйэтин аатын ааттаппыт Саха тыйаатырын уонна уус-уран салайааччыгыт Андрей Саввич Борисовы истэбит, билэбит. «Король Лир» испэктээги финно-угорскай тыллаах тыйаатырдар элбэхтэ туруорбуттара, оттон бүгүн саха төрүт тылынан оонньонор испэктээкил – култуура хааччахтамматын, искусство муҥура суоҕун өссө биирдэ бигэргэттэ. Норуот бэйэтин култууратын, тыйаатыр искусствотын нөҥүө төрөөбүт тылынан хайа баҕарар омукка тиэрдиэн сөп диэн көрдөрдө.

Олег Иркабаев, Йошкар-Ола Үүнэр көлүөнэтин тыйаатырын уус-уран салайааччыта:

– Эпическэй хабааннаах күүстээх испэктээги көрөн улаханнык сөҕөн-махтайан турабын. Олус күүстээх труппа, барыта ымпыгар-чымпыгар тиийэ толкуйдаммыт туруоруу, испэктээккэ барыта бэйэ-бэйэтин ситэрэр. Артыыстар оруолларын дьиҥнээхтии олорон көрдөрдүлэр. Бу испэктээк саха норуотугар улахан суолталаах туруоруу эбит диэн көрдүм. Бүгүн Шекспир айымньытыгар киһини умсугутар, көрөөччү болҕомтотун тардар саха Илиир Хоруола көһүннэ. Аан дойду классикатын бэйэҕит норуоккут нөҥүө көрдөрбүккүт улахан ситиһии.

Айталина Седалищева, Чурапчыттан төрүттээх биир дойдулаахпыт:

– 1991 сыллаахтан кэргэним төрөөбүт куоратыгар Йошкар-Олаҕа олоробун. Дойдубар тиийдэхпинэ Саха тыйаатырыгар сылдьабын, былырыын режиссер Руслан Тараховскай туруоруутун көрбүтүм. Тыйаатыры сөбүлүүбүн, онон гостуруоллуу кэлбит тыйаатырдар  афишаларын кэтиибин. Саха тыйаатырын испэктээктэригэр билиэт номнуо ылбытым.

Бүгүн киэһэ Йошкар-Ола куоракка Саха тыйаатырын гостуруолун Сергей Потапов туруоруутугар Михаил Булгаков «Маастар уонна Маргарита» испэктээгэ түмүктүөҕэ.