«Өймөкөөн – Тымныы полюһа» экстремальнай марафон кыайыылаахтарынан Александр Моедо уонна Леонид Зыков буоллулар

Тохсунньу 11 уонна 12 күннэригэр буолан ааспыт «Өймөкөөн – Тымныы полюһа» VI-с экстремальнай марафон Саха сирин 13 оройуонуттан уонна Арассыыйа 16 регионуттан, ол иһигэр Красноярскай, Челябинскай, Иркутскай, Балашиха, Москва куораттартан 50 спортсмен кыттыылаах буолан ааста.

50 кыраадыстан тымныыга 50 км уһуҥҥа ультрамарафон кыайыылааҕынан Өлүөхүмэ улууһуттан Александр Моедо буолла. Кини чэпчэки атлекаҕа спорт маастара, ис дьыала уорганнарын үлэһитэ. 42,2 км уһуннаах сүүрэр суолу бастакынан Хаҥалас улууһун бэрэстэбиитэлэ Леонид Зыков түмүктээтэ. Леонид Зыков – ЫБММ үлэһитэ, хайыһарга, чэпчэки атлетикаҕа, мини-футболга өрөспүүбүлүкэ хас да төгүллээх призера уонна чемпиона, «Өймөкөөн – Тымныы полюһа» марафон икки төгүллээх муҥутуур кыайыылааҕа. 

«Бу марафон – аан дойдуга соҕотох тымныы сүүрүү. Бу күннэргэ Өймөкөөҥҥө халлаан -50° кыраадыска тиийэ тымныйа сылдьыбыта! Марафон хас биирдии кыттыылааҕа ис сүрэхтэн сөхтөрөр, кинилэргэ инникитин даҕаны ситиһиилэри, саҥа кыайыылары баҕарабын!» – диэн Ил Дархан Айсен Николаев бэйэтин телеграмм-ханаалыгар суруйбута.
Санатар буоллахха, марафон бастакы күнүгэр 5 км уһуҥҥа – Полина Слободчикова (Сунтаар), 10 км – Алексей Кузько (Дьокуускай), 15 км – Эдуард Ксенофонтов (Хатас) уонна 21,1 км Алексей Герасимов (Дьокуускай) кыайыылааҕынан тахсыбыттара. 
Сүүрүүлэргэ 18-тан 70-гар диэри саастаах спорт бу көрүҥүгэр сүгүрүйээччилэри сэргэ идэтийбит спортсменнар кыттыбыттара. 

Марафон Улуу Кыайыы 80 сылыгар уонна Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сылларыгар анаммыта.
Кыттааччылар бары Аҕа дойду Улуу сэриитин кыттыылааҕа аймахтарын мэтириэтин түөстэригэр иилинэн сүүрдүлэр, диэн Ил Дархан уонна Бырабыыталыстыба пресс-сулууспата иһитиннэрэр. Хаартыска: «Северная заря» хаһыат, Өймөкөөн улууһа.