Бастыҥ көстүүм иһин – 100 тыһ. солк.

“Ykt Geek Fest” бэстибээл быйыл 12-с төгүлүн тэриллэр. Манна аниме, киинэ, комикс, видео уонна остуол оонньууларын сүгүрүйээччилэрэ мусталлар.

Тэрийээччилэр интерактивнай экспозициялары, оонньуур былаһааккалары, фан-көрсүһүүлэри уонна маастар-кылаастары бэлэмнээбиттэр. Ону тэҥэ косплейдэри уонна креатордары (айааччылары) кытта сирэй көрсүһүүлэр тэриллиэхтэрэ.  

Маны таһынан, элбэх ырыа-тойук, үҥкүү былааннаммыт. Уруһуй уонна кылгас киинэ куонкурсугар хаһааҥҥытааҕар да элбэх киһи суруйтарбыт. Косплейдар, “Тооку” оҕо ханаалыттан “Имана” диэн саҥа ойуулугун киэҥ араҥаҕа таһаарыы, “Айар” саҥа кинигэлэрин атыыта, квестар, муусукалаах лотуо, түөрт тиир, лазертаг, хаартыскаҕа түһүү, аһыы лапсаны сиэһиҥҥэ чемпионат, быыстапкалар, о.д.а. тэриллиэхтэрэ.

“Архитектура реальности” сахалыы устуудьуйа “Kindawn: The Parish Remembers” диэн саҥа оонньууну сүрэхтиэҕэ. Бэстибээл кэмигэр Степан Бурнашев “Пентхаус” диэн уйулҕаны хамсатар триллерин уонна “Айа да Айан” диэн комедийнай киинэни сүрэхтиэхтэрэ.

Бастыҥ көстүүм иһин Гран-при хаһаайына быйыл уу харчынан 100 тыһ. солк. ылыаҕа.