Үйэ саас: 100 тыһ. солк дуу? 1 мөл. солк. дуу? 

Ол курдук, Дьокуускай куорат дьаһалтата үбүлээргэ 100 тыһ. солк. туттарбытын кэнниттэн социальнай ситимнэргэ «мөлүйүөн буолуохтаах этэ» диэн соһуйбут, хомойбут даҕаны дьон баара.

«Киин куорат» бу түгэни быһааран биэрэри наадалааҕынан аахта. Ол курдук, үбүлээргэ 100 тыһ. солк. Дьокуускай куорат дьаһалтата туттарар, оттон өрөспүүбүлүкэ 2024 сылтан «Үйэ саас» Бочуот бэлиэтигэр туттарыллар бириэмийэ кээмэйин уон төгүл үрдэтэн, биир мөлүйүөҥҥэ тиэрдэн турар.

Анна Евсеевна Атласова 1926 сыллаахха Нам оройуонугар төрөөбүтэ. 1941 сыллаахха суотчут куурсугар үөрэнэн, холкуоска үлэлээбитэ. Аҕа дойду Улуу сэриитэ түмүктэнэр сылыгар Анна Евсеевна «За доблестный и самоотверженный труд в годы Великой Отечественной войны» мэтээлинэн наҕараадаламмыта. 1946 сыллаахха кэлин биллиилээх суруналыыс буола үүммүт Николай Терентьевич Атласовы кытта ыал буолан, 6 оҕону күн сирин көрдөрбүттэрэ, атахтарыгар туруорбуттара. Анна Евсеевна араас сылларга Ньурба, Муома оройуоннарын уонна Дьокуускай куорат өрөспүүбүлүкэтээҕи балыыһатыгар буҕаалтырынан үтүө суобастаахтык үлэлээбитэ.

Ил Дархан Айсен Николаев 2025 сыл ахсынньы ыйыгар Ил Түмэҥҥэ Анал этиитигэр Саха сиригэр бүгүҥҥү күҥҥэ 100 сааһын томточту туолбут 18 ытык кырдьаҕас олорорун, онтон 2025 сылга 14 ытык кырдьаҕас 100 сааһын туолбутун, саамай аҕа саастаах Татьяна Семеновна Сафонова 104 саастааҕын бэлиэтээн турар. Эбэн эттэххэ, Саха сиригэр бүгүн 90 сааһын ааспыт ытык кырдьаҕас ахсаана 1500 тиийэн турар.

«Киин куорат» Анна Евсеевна Атласованан сирэйдээн бары ытык кырдьаҕастары эҕэрдэлиир уонна чэгиэн туругу, этэҥҥэ буолууну баҕарар!