“Өйдөөх” поликлиникаҕа 100 күн иһигэр 148 000 тахса киһи сырытта

Регистрацияламмыт нэһилиэнньэ ахсаана 55 тыһыынча кэриҥэ буоларын учуоттаан туран, хас биирдии киһи ортотунан бырааска иккитэ көрдөрбүтэ бэлиэтэнэр. Балыыһа кылаабынай бырааһа Саргылана Васильева этэринэн, бу кэм устата исписэлиистэр 35 тыһыынчаттан тахса профилактическай көрүүнү ыытан, 11 тыһыынчаттан тахса суһал медицинскэй көмөнү оҥорбуттар.

“Кылгас кэм иһигэр балыыһа олохтоох дьон итэҕэлин ылла. Үгүстэр кэтэһии бириэмэтэ аҕыйаабытын, отделениелар сөптөөх миэстэлэрин, табыгастаах усулуобуйалаахтарын бэлиэтииллэр”, – диир медицинскэй тэрилтэ дириэктэрэ.

Саха сирин бырабыыталыстыбатын уонна “ВИС” бөлөх судаарыстыбаннай-чааһынай бииргэ үлэлээһин дуогабарынан тутуллубут балыыһа 8800 квадратнай миэтэрэттэн тахса иэннээх. Манна 700-тэн тахса аныгы, эксперт таһымнаах тэриллэр бааллар, ол иһигэр КТ, МРТ, рентген, УЗИ уо.д.а. Тэриллэри “ВИС” бөлөх хааччыйбыт уонна туруорбут, ол эбийиэк тэхиньиичэскэй көрүүтүн чэрчитинэн быыстала суох үлэлиирин хааччыйар.

Манна оҕо, улахан киһи уонна дьахтар консультацията тэҥинэн үлэлиир – урут куорат араас сиригэр бааллара.

Ыарыһахтар быраастарга электроннай өҥө нөҥүө суруйтараллар.

Судаарыстыбаннай-чааһынай үлэлэһии сөбүлэҥинэн “ВИС” бөлөх тэхиньиичэскэй хааччыйыынан уонна оборудованиелар инженернэй систиэмэлэрин көрүүнэн 2030 сылга диэри дьарыктаныахтаах. Оттон бу сотору, муус устар ыйга, холдинг поликлиника быраастарын Н.И. Пирогов аатынан РНИМУ – Арассыыйа биир инники күөҥҥэ сылдьар медицинскэй университетыгар стажировкаҕа ыытыахтаах.