Ыччат – үтүө дьыалаҕа

«Киин куоракка» анаан Нам улууһун Ленскэй нэһилиэгин ыччат лидерэ Майя Румянцева иһитиннэрбитинэн, ааспыт өрөбүллэргэ кинилэргэ Дьокуускайтан 127 устудьуон тахсан, стадион хаарын күрдьүбүттэр.

Ону таһынан Степан Платонов аатынан уулуссаҕа сааскы ууну ыытар ханаабаны ыраастаабыттар. АБДь кыттыылаахтарын чугас дьонноругар көмөнөн 10 ыал хабыллыбыт.
Бэлиэтээн эттэххэ, ыччат десана Нам улууһугар бу иккис сырыыта эбит. Десант кыттыылаахтара аһынан-үөлүнэн хааччыйбыт «СуНами» кафеҕа (сал. Егор Жирков), хонор дьиэнэн көмөлөспүт Петр Юмшанов аатынан Намнааҕы Оҕо спорт оскуолатыгар (сал. Борис Егоров)  махталларын тиэрдэллэр.

Ленскэй нэһилиэгэ бу өрөбүллэргэ спорт эйгэтигэр эмиэ кэккэ ситиһиилэммит. Ол курдук, спорт инструктора Харысхан Попов иһитиннэрбитинэн, судаарыстыбаннай диэйэтэл Илья Винокуров 130 сылыгар анаан ыытыллыбыт спартакиадаҕа 1 миэстэни ылан, нэһилиэктэрин ааттаппыттар.

Сааскы өрөбүл күннэр Нам улууһугар бу курдук үрдүк күүрүүлээхтик ааспыттар.