Ыччат өрөспүүбүлүкэтээҕи бэстибээлгэ муһунна

Быйылгы үбүлүөйдээх 5-с төгүлүн ыытыллар өрөспүүбүлүкэтээҕи “Муус устар-2025” ыччат бэстибээлин сирэй күрэхтэһиилээх түһүмэҕэ кулун тутар 17 күнүгэр Дьокуускай куоракка үөрүүлээхтик аһылынна. Саха сирин араас улууһуттан куонкурустар сүүмэрдиир муниципальнай түһүмэхтэрин туораабыт хамаандалар бэстибээлгэ кытта  өрөспүүбүлүкэ киин куоратыгар муһуннулар. Быйылгы кыттааччы ахсаана 3 тыһ. кэриҥэ ыччат. 
РФ Бэрэсидьиэнэ Владимир Путин бэстибээл кыттыылаахтарыгар эҕэрдэтин тириэрдэригэр: “Муус устар” көннөрү бэстибээл эрэ буолбакка, бэйэлэрин көҕүлээһиннэринэн уонна үлэлэринэн төрөөбүт дойдуларын сайыннарарга бэлэм ньэҥирдээх, дьоҕурдаах уонна дьулуурдаах ыччаты түмэр уопсастыбаннай уонна култуурунай феномен буолар” ¬– диэн бэлиэтээтэ. 
СӨ Бырабыыталыстыбатын тэрийиитинэн, “Эльга” хампаанньа быһаччы өйөбүлүнэн ыытыллар ыччат бэстибээлэ аҥаардас куонкуруһунан эрэ муҥурдаммат, тэрээһин чэрчитинэн форумнар, маастар-кылаастар, пленарнай мунньах, үлэлиир эйгэлэригэр ситиһиилээх дьоннуун көрсүһүү, хамсааһыннар слеттара уо.д.а. ыччат билиитин-көрүүтүн сайыннарар соруктаах тэрээһиннэр ыытыллаллар. 
Кэлбит хамаандалар бэстибээл бастакы күнүттэн хайысхаларынан аттарыллыбыт куонкурустарга финалга киирсэр иһин көхтөөхтүк күрэхтэһэн саҕалаатылар. Санатар буоллахха, быйылгы ыччат бэстибээлэ 12 хайысханан үлэлиир: «Воплощай и вдохновляй», «Якутия – твоя сила духа», «Перспектива в познании», «Вперед к победам!», «Медиа-будущее: расскажи о важном!», «Развивайся в Якутии!», «Добываем будущее вместе!», «Созидай и создавай!», «Твори добро!», «ЭТнО-МЫ!», «Россия – страна возможностей!», «Защитник Родины!».
Биэс күн устата буолар тэрээһиҥҥэ  үгэс буолбут куонкурустары таһынан хамаандалар саҥа “Креасфера+” архитектордар, “Лента времени”, “Сомоҕолоһуу күүһэ: байыаннай бэлэмнээх буолуу уонна патриоттуу иитии төрүттэрэ”  патриотическай, “Дроннар сырсыылара” күрэстэргэ уонна Арктика кубогар фиджитал-футбол көрүҥэр күрэхтэһэ сылдьаллар. 
Маны сэргэ бэстибээл кэмигэр зачекка киирбэт “Якутский стендап: Кубок Арктики” уонна эдэр блогердар куонкурустара ыытылла турар. 
Сорох көрүҥнэргэ номнуо кыайыылаахтар ааттанан үөрүү өрөгөйүн биллилэр. Оттон уопсай түмүгү иһитиннэрии, бэстибээли үөрүүлээхтик түмүктүүр дьоро тэрээһин, кыайыылаахтары чиэстээһин кулун тутар 22 күнүгэр “Триумф” спорт уораҕайыгар буолуо.

Хаартыска: “МУУС УСТАР” бэстибээл официальнай Тг-каналыттан.