Ыччат, болҕой: үс күннээх ыччат бэстибээлэ!

Бэс ыйын 25-27 күннэригэр Дьокуускай куоракка «Эдэр дьон күнэ. Ыра санаа. Киэн туттуу. Биир сомоҕо» диэн Арассыыйа эдэр дьонун күнүгэр анаммыт бэстибээл буолуоҕа.

Бырагыраама патриоттуу тыыннаах, спорт, култуура уонна идэни талыыга көмөлөөх  тэрээһиннэрин түмүөҕэ. Бырааһынньык сүрүн тиэмэтэ —  Арассыыйа норуоттарын биир сомоҕо буолуулара.

Бэс ыйын 25 күнүгэр Култуура уонна сынньалаҥ пааркатыгар «Саллаакка сурук» аахсыйа, «Өйдөбүл — өҥнөргө» быыстапка, араас маастар-кылаастар, ыҥырылаах ыалдьыттары кытта көрсүһүү, спорт тэрээһиннэрэ уонна «Саха сиригэр үлэлээ» диэн үлэ дьаарбаҥката (паарка аллеятыгар күнүс 15 чаастан киэһэ 19 ч. диэри) былааннаммыт.

Бэс ыйын 26 күнүгэр «Патриот» ыччат киинигэр эдэр бибилэтиэкэрдэр форумнара, «Доруобуйа кода» оонньуу, музыкальнай лото буолуоҕа.  Киинэ көрдөрүөхтэрэ, Арассыыйа дьоруойун кытта көрсүһүү, "Билии" уопсастыба лиэксийэтэ буолуоҕа.

Бэс ыйын 27 күнүгэр тэрээһин Үс Хатыҥҥа салҕаныа. Ол курдук «Хотугу оонньуулар», «Дыгын оонньуулара» уонна «Этно Фест» кэнсиэр бэстибээл чэрчитинэн барыахтара.

Маны таһынан бырагыраамаҕа онлайн-бырайыактар, подкастар, викториналар уонна  истибиттэн суруйуу киирэллэр.
Ыччат бэстибээлин хас биирдии кыттааччыта «Эдэр саас пааспарын» ылыан уонна бэстибээл тэрээһиннэригэр кыттыбытын туһунан бэчээти хомуйуон сөп.

Тэрээһиннэр бырагыраамаларын билэргэ http://xn--d1aacfkpghkb4mrc.xn--p1ai/ саайты, онно сигэтэ баар Макс мессенджер чат-ботун туһаныҥ.