Ярыгин турнира: Бырагыраамаҕа уларыйыы киирдэ

Дьокуускай бириэмэтинэн 13.00 чаастан саҕалаан боруонса мэтээл иһин күөн көрсүһүүлэр буолуохтара. Киэһэ 19:30 чаастан турнир үөрүүлээх аһыллыытын сиэрэ-туома ыытыллыаҕа. Ол кэннэ финал хапсыһыыларын көрүөхпүт.

Барыллаан киирсиилэр боруонса мэтээл иһин күөн көрсүһүүлэр кэнниттэн, үөрүүлээх аһыллыы иннигэр уонна финал хапсыһыыларын кэнниттэн буолуохтара.  

Бүгүн барыллаан киирсиилэргэ тахсыахтара:

Василий Григорьев, Юлиан Григорьев, Владислав Кривошапкин (65 кг);

Никита Софронов, Никита Хабаров уонна Харысхан Баппаҕай (125 кг).

Саха сирин эрэллэрэ Лев Павлов, Артём Слепцов (57 кг), Александр Авелов (61 кг) уонна Айсен Потапов (70 кг) боруонса мэтээл иһин киирсиэхтэрэ.

Финалга Таджикистантан кыттар Виктор Рассадины (70 кг) долгуйа күүтэбит. Кини Ярыгин турнирын былырыыҥҥы кыайыылааҕа Давид Баевтыын күөн көрсүөҕэ.

Красноярскайтан быһа биэриилэри «Мамонт» уонна  «Саха» НКИХ ханаалларыгар, «Тэтим» араадьыйа долгунугар уонна «Кыах» ВКонтакте бөлөҕөр уонна ТГ-ханаалыгар көрүөххэ-истиэххэ сөп. 

Спортсменнарбытыгар ситиһиилэри баҕарабыт!