Ыарахан айаны бииргэ кыайдыбыт!

Кулун тутар бүтэһик күннэригэр биһиги кылааһынан Кэбээйигэ Сиэгэн Күөлгэ үс күннээх экспедицияҕа сылдьан кэлбиппит.

Бастакы күммүт айаҥҥа ааспыта. Оскуолаттан 14 оҕо, 3 улахан киһи буолан, үс массыынанан барбыппыт. Сиэгэн Күөл оскуолатыгар тохтообуппут, онно хоммуппут.

Иккис күммүтүгэр кыра ыһыктаах Пик Чекистов хайаҕа туруммуппут. Икки килэмиэтири халыҥ хаарынан суол оҥоро-оҥоро хааман, икки чааһынан хайаҕа тиийбиппит. Онтон үөһэ 1400 миэтэрэни дабайбыппыт. Мууһунан тахсар ыарахан да буоллар, мастан тутуһа-тутуһа, бэйэ-бэйэбитигэр көмөлөһөн, хайаҕа тиийбиппит. Онтон бириэмэбит өссө элбэх буолан, саамай үөһэтигэр диэри тахсыбыппыт.

Үөһэттэн аллараны көрөр ураты этэ. Дойдубут кэрэ да эбит! Бары чыпчаалга тахсан, үөрэ-үөрэ хаартыскаҕа түһэн, былаахпытын хаалларан баран, төттөрү түспүппүт.

Аныгыскы күммүтүгэр эрдэ туран, аһаан, оскуоланы хомуйан, хомунан, дьиэбитигэр айаннаабыппыт. Төннөрбүтүгэр суоппарбыт Сашаны кытары тэҥҥэ ыллаан-туойан кэлбиппит.

Бу экспедиция дьиҥнээх олох тургутуутун ааһыы этэ. Учууталбыт эппитинэн, чиэстээх эрэ киһи хайа муҥутуур чыпчаалыгар диэри тиийиэн сөп. Суолбут ыарахан да буоллар, мин бэриммэтэҕим уонна тиийбит сыалбын-сорукпун толорбутум! Бу экспедицияны өссө өр саныы сылдьыаҕым.

Валерия Адамова

Айаннаан иһэн, сэриигэ өлбүт чекистэргэ анаммыт пааматынньыгы көрөн ааспыппыт. Хайаттан ыраах соҕус тохтообуппут, онтон 2 чаас тоҥуу хаарынан хаампыппыт. Үөһэ тахсарбытыгар эмиэ оннук этэ. Ол истэхпитинэ, эмискэ чигдитийбит хаар тиийэн кэлбитэ, халтархай, тахсарга ыарахан этэ. Төннөрбүтүгэр бэйэбит тэлбит суолбут баар буолан, начаас кэлбиппит.

Дьиэбитигэр айаннаан иһэн Батамайга баар күн сардаҥаларынан үлэлиир ыстаансыйаны көрбүппүт. 

Бу сылдьыбыппытын мин олоҕум тухары өйдүү-саныы сылдьыаҕым. Кэбээйи хайаларын кэрэтэ өргө диэри харахпар хатанан хаалыаҕа.

Махтаныахпын баҕарабын учууталларбытыгар Александр Константиновичка, Клара Борисовнаҕа, төрөппүттэргэ уонна биһигини таспыт суоппардарбытыгар Димаҕа уонна Сашаҕа.

Аяна Богдокумова

Ыарахан этэ, ол эрээри сыалбытын бары ситиспиппит, сорукпутун толорбуппут. Хайа үрдүгэр уопсайа уон чаас сылдьыбыппыт. Барытын олус сөбүлээтим, хайаҕа ыттар уустугун биллим.

Ньургун Старков

Биһиги, дириҥ хаары кэһэ-кэһэ, баҕа санаабытынан салайтаран, сылайбыппытын киэр илгэн, кэпсэтэ-кэпсэтэ айаннаан, бытааннык эрээри, тохтообокко хайа үрдүгэр үөрэ-көтө тиийбиппит.

Үөһэттэн хайалаах сири көрөр наһаа кыраһыабай этэ. Хаартыскаҕа түһэн, «Үрдэл» былаахпытын сиргэ анньан, үрдүк хайалары көрө-көрө, массыынабытыгар төттөрү түспүппүт.

Арсений Чочанов

Хайаҕа тахсар ыарахан. Наһаа сылайаҕын, ол гынан баран үөһэттэн айылҕа кэрэ көстүүлэрин көрөн, иккис тыын киирэргэ дылы буолар эбит.

Наһаа үчүгэй, интэриэһинэй сырыы буолла. Бэйэбит хайаҕа тахсан, бастакынан суолбутун хааллардыбыт. Салайааччыларга улахан махтал!

Арылхан Костромин

Сарсыҥҥы күнүгэр таһаҕаспытын уктан баран, Тумара күөл диэки айаннаабыппыт, хаҥкылаары, сырылаары. Хомойуох иһин, суолбутун тибэн кэбиспит этэ, ол иһин дьиэбитигэр айаннаабыппыт.

Бу экспедиция, мин санаабар, өссө хас да сыл умнуллуо суоҕа. Билигин саныы-саныы төттөрү барыахпын баҕарабын. Хайалар киһини олус күүскэ бэйэлэригэр тардар эбиттэр.

Анатолий Марков

Мин бу экспедицияны наһаа сөбүлээтим. Бары биир киһи курдук, биир өйүнэн-санаанан сылдьыбыт буолан, ыарахан айаны кыайдыбыт. Хайа үрдүгэр тахсан, биһиги саҥа суол тэлэн хааллардыбыт.

Артур Перевалов

Киһи эрэ барыта сатаан ыттыбат хайатыгар тахсыбыппыттан астынным. Бу экспедицияҕа сылдьан олорор дойдум кыраһыабайын көрөн сөхтүм.

Улахан махталбын Александр Константиновичка тиэрдиэм этэ. Кини баар буолан, төрөөбүт дойдубун көрөрүм-истэрим элбээн иһэр.

Айтал Софронов

Ыарахан, чэпчэкитэ суох айаҥҥа бэйэ-бэйэбитигэр көмөлөсүһэн хайаны дабайдыбыт дии саныыбын. Хата, төрөппүттэр баар буоланнар, аспыт элбэҕэ, дэлэйэ үчүгэй этэ.

Төннөрбүтүгэр ырыа-тойук бөҕө, суолбутун билбэккэ да хаалбыппыт. Дьиэбэр кэлэн баран, хайалары ахтан, сүгүн утуйбатаҕым.

Улахан махтал Александр Константиновичка, Клара Борисовнаҕа уонна төрөппүттэргэ!

Влад Боескоров

Мин санаабар, бу экспедиция олус үчүгэйдик табылынна. Хайаҕа тахсыы сылаалааҕын өйдөөтүм. Саха сирэ хайдах курдук улаханын, кыраһыабайын сөҕө-махтайа көрдүм. Маннык экспедициялар куруук буолуохтара диэн эрэнэбин.

Ярослав Попов