ЯПАК тэрилтэ 70 сылын бэлиэтээтэ

«Дьокуускайдааҕы пассажирскай массыына тырааныспарын хампаанньата» муниципальнай унитарнай тэрилтэ (ЯПАК МУП) төрүттэммитэ 70 сылын бэлиэтээтэ.

Ол курдук, куорат уопсастыбаннай тырааныспарын сүрүн уонна соҕотох тэрилтэтэ 1955 сыл ахсынньы 1 күнүттэн силис тардар. 70 сыл аннара өттүгэр пассажирдары тиэйэр оптуобустар пааркалара Дьокуускайдааҕы пассажирдары тиэйэр хаһаайыстыбаттан (ЯПАХ) арахсан, туспа тэрилтэ буолар. Биллэн турар, бу да инниттэн куорат олохтоохторо ЯПАХ тэрилтэ оптуобустарын өҥөтүнэн туһанар этилэр. Пассажирдары, таһаҕаһы тиэйэр массыыналар, оннооҕор сыарҕалаах ат көлө Саха АССР миниистирдэрин сэбиэтин бас билиитигэр сылдьыбыт кэмнэрэ кытта баара. Оттон ЯПАХ бас билиитигэр оптуобустары таһынан М-20 мааркалаах кыра, ГАЗ-51 ыарахан уйуктаах массыыналар бааллара. Тэрилтэ Ленскэйгэ, Алдаҥҥа филиаллардааҕа. Дьокуускай куорат уулуссаларынан бастаан ЗИС-155, кэлин ПАЗ-651, ЗИЛ-158 мааркалаах оптуобустар сүүрэллэрэ. Кэм-кэрдии уларыйдаҕын, сайдыы кэллэҕин ахсын кинилэри норуокка «сарай» диэн ааттаммыт ЛиАЗтар, «турист» дэммит ЛАЗтар, ИКАРУСтар солбуйбуттара. Ааспыт үйэ 80-с сылларыгар ЯПАП өрөспүүбүлүкэ оройуоннарыгар 16 филиаллааҕа.

Тэрилтэни араас сылларга  Иосиф Алексеевич Коршунов,  Иосиф Соломонович Копылевич, Владимир Соломонович Рабинович,  Александр Константинович Виноградов, Валентин Семенович Андросов,  Юрий Иванович Рожков,  Анатолий Семенович Сокрут, Евгений Николаевич Фаст, Анатолий Вениаминович Чирков, Александр Анатольевич Антипин о.д.а. салайбыттара.

Тэрилтэ ордук кыаҕырар кэмэ 1984 сыллаахха Ю.И. Рожков дириэктэринэн ананыаҕыттан саҕаланар. Ол курдук, тэрилтэ бэйэтигэр гараастары, өрөмүөн ыытар мастарыскыайдары, массыына сууйар дьиэлэри туттар. Бэл, үлэһиттэрин олорор дьиэнэн хааччыйар. Ол курдук, тэрилтэ бэйэтин күүһүнэн 96 толору хааччыллыылаах кыбартыыраны, 148 миэстэлээх уопсай дьиэни туппут, тымныы ыскылааттаах маҕаһыыннаммыт. Оҕо саада, дьааһыла, медпуун, тиис эмтиир кабинет, остолобуой, парикмахерскай, кэтэх хаһаайыстыба баар буолбуттар. Тэрилтэ үлэһиттэрэ итини сэргэ пионер лааҕырын, санаторий-профилакторий, поликлиника өҥөлөрүнэн харгыһа суох туһанар кыахха тахсыбыттар.

Бүгүҥҥү күҥҥэ тэрилтэ дириэктэрин эбээһинэһин Спартак Шульгин толорор.

ЯПАК МУП 2022-2025 сылларга 174 саҥа оптуобуһунан хааччылынна. «Тырааныспар ситимин сайыннарыы» муниципальнай бырагырааманан туруоруллубут 87 сылаас тохтобултан 58-һа муниципальнай, 26-та - чааһынай. Куорат баһылыга Евгений Григорьев биэс сыллаах үлэтинэн отчуоттарыгар бэлиэтииринэн, уопсастыбаннай тырааныспар пааркатын саҥа тиэхиньикэнэн хааччыйыы, сылаас тохтобул ахсаанын элбэтии түмүгэр графигы толоруу 2021 сыллааҕы 70%-тан 2025 сылга 94% диэри тупсубут.