Ыал буолааччыларга

Быйыл, 2025 сылга, аал уоту оттунар, алаһа дьиэни тэринэр алгыстаах санааны ылынан, ыал буоларга суоттанар дьоҥҥо туһалаах иһитиннэрии.

Өскөтүн ыал буолааччылар иккиэн өрөспүүбүлүкэҕэ олорор, хайалара да 25 саастарын туола илик уонна аан бастакыларын саахсаланар түгэннэригэр, өрөспүүбүлүкэттэн биир кэмнээх 50 тыһ. солк. ананар.

Ону ылар туһугар кэргэнниилэртэн биирдэстэрэ Судаарыстыбаннай өҥө порталын нөҥүө Дьокуускайдааҕы нэһилиэнньэ үлэҕэ уонна социальнай көмүскэллээх буолууга управлениетыгар сайабылыанньа ыытыахтаах.

*Санатабыт: Маннык быраап ыал буолбут (ЗАГС-ка регистрацияламмыт) күнтэн саҕалаан 6 ый устата дьайар. Ол кэми куоттарбат гына дьаһаныҥ.

Ыал буоларга «кырасыабай» күннэр

Олохторун холбуур эдэр дьон, хайа кыалларынан, ЗАГС-ка бэйэлэригэр чугас уонна ордук өйдөнүмтүө уонна “кырасыабай” күннэргэ регистрациялана сатыыллара – баар суол. Үүммүт 2025 сылга, көрдөххө, уһулуччу бэлиэ, “зеркальнай” дэнэр сыыппара, суох. Ол да буоллар, үгүстэр, 25.08.2025, 02.05.2025 уонна 05.05.2025 тала сатыахтара диэн санаа баар. Холобур, олунньу 14 күнүгэр, Тапталлаахтар күннэригэр, 30 саҥа ыал үөскээбит этэ.

25.08.2025 былаанныыр дьон, билиҥҥиттэн Судаарыстыбаннай өҥө порталыгар киирэн, эрдэттэн сайабылыанньалаһар кыахтааххыт. Манна даҕатан эттэххэ, регистрацияланар күн буолуо, кырата, биир ый инниттэн сайабылыанньаны ыытар наада.