«Якутия мастеровая» бырайыак финалистарын быһаардылар

Норуот уус-уран оҥоһуктарынан дьарыктанар урбаанньыттар, бэйэ дьыалатын арыммыт уонна биирдиилээн дьон ортотугар ыытыллыбыт «Якутия мастеровая» бырайыак кыайыылаахтара 100 тыһ. солк. кээмэйдээх грант ылар кыахтаахтар.

Ол курдук, «Якутия мастеровая» бырайыак бастакы түһүмэҕэр маастардар онлайн-форматынан бэйэлэрин үлэлэрин билиһиннэрбиттэрэ. Оттон үрдүк сыанабылы ылбыт бырайыактар хаһаайыттара кэлэр нэдиэлэҕэ Дьокуускайга кэлэн үрдүттэн анал үөрэҕи барыахтара, бизнес-трениннэргэ, бырайыактыыр үлэҕэ кыттыыны ылыахтара, атын даҕаны тэрээһиннэргэ сылдьыахтара. Үөрэх кэмигэр уонна «Бизнес Экспо 2024» быыстапка чэрчитинэн маастар-кылаастары ыытыахтара, уопуттарын үллэстиэхтэрэ. Бастыҥ көрдөрүүлээх маастардар тус дьыалаларын сайыннарарга 100 тыһ. солк. кээмэйдээх грант хаһаайына буолуохтарын сөп.
Күрэх экспертэринэн «Мой бизнес» киин бэрэстэбиитэлэ Анна Филиппова, «Камелек» хампаанньа, «Сделано в Якутии» ассоциация бэрэссэдээтэлэ, уопсастыбаннай палаата чилиэнэ Ольга Григорьева, «Симэх» киин дириэктэрэ Яна Игнатьева, «Оһуор утум» хампаанньа салайааччыта Любовь Заболоцкая уонна урбаанньыт Александра Егорова үлэлээтилэр.
Санатар буоллахха. «Мой Бизнес» киин Владимир Путин көҕүлээһининэн олоххо киирэр «Малое
и среднее предпринимательство и поддержка индивидуальной предпринимательской
инициативы» нацбырайыак иитинэн урбаанньыттарга босхо өйөбүлү оҥорор. Национальнай бырайыак чэрчитинэн ыытыллар тэрээһиннэр, куонкурустар, судаарыстыбаннай өйөбүл көрүҥнэрин туһунан сиһилии тэрилтэ телеграм ханаалыгар, вконтакте, одноклассники социальнай ситимнэригэр, Мойбизнес14.рф порталга уонна (800)100-58-80 төлөпүөнүнэн билсиэххэ сөп, диэн иһитиннэрэр Ил Дархан уонна Бырабыыталыстыба пресс-сулууспата.