Выпускник үксэ естественнэй наука хайысхатын талар

Саамай элбэхтэ талыллыбыт эксээмэн – профильнай математика (выпускник 32% талбыт) буолбут. Салгыы обществознание  — 29,1% уонна биология — 14,5%.

Быйыл физикаҕа интэриэс күүһүрбүтэ көстөр – былырыыҥҥытааҕар 219 киһинэн элбэх туттарбыт. Химияны туттарааччы 96-нан элбээбит, биологияны туттарааччы ахсаана 71-нэн эбиллибит. Профильнай математиканы туттарбыт оҕо ахсаана 203-нэн эбиллибит.

Физиканы быйыл 1114 оҕо туттарбыт, 95% эксээмэн алын таһымын ааспыттар. Профильнай математикаҕа алын таһымы  92% ааспыт, 63 выпускник 90 баалтан үрдүккэ туттарбыт.

28 оҕо 9 биридимиэккэ 100 баалга туттарбыт. Ол иһигэр 6 муҥутуур көрдөрүү профильнай математикаҕа, 4 – химияҕа, 3 – физикаҕа буолбут.

Оскуолаҕа оҕолорун профильнай үөрэхтээһин улахан кылаас оҕолоругар кэккэ биридимиэттэри дириҥэтэн үөрэтэргэ кыах биэрэр. Профильнай үөрэхтээһини киллэрэн үөрэх хаачыстыбатын тупсарыы “Ыччат уонна оҕолор” национальнай бырайыакка тирэҕирэр. Ону тэҥэ дойдубутугар “Новая школа” федеральнай бырайыак үлэлиир.