Волейбол таһыма үрдээн иһэр

Олунньу 27 – кулун тутар 2 күннэригэр ытык Эҥсиэли сиригэр-уотугар, Намнааҕы  Нь.С. Тимофеев аатынан  оҕо спорт оскуолатыгар волейболга 1-кы лига эр дьонугар өрөспүүбүлүкэ чемпионата үрдүк тэрээһиннээхтик ыытылынна. Орто-Халыма, Дьааҥы, Өймөкөөн, Усуйаана, Кэбээйи, Мииринэй, Сунтаар, Ньурба, Хаҥалас, Нам хамаандалара кыраһыабай, сытыы киирсиилэри көрдөрдүлэр. Сүрүн сыал-сорук: бастакы уонна иккис миэстэлэри ылаттаабыт хамаандалар үрдүкү лигаҕа тахсар чиэһи ылыахтаахтар.

Болҕомто киинигэр – сүүмэрдэммит хамаанда

Чемпионат үөрүүлээхтик аһыллыытыгар Нам улууһун баһылыгын солбуйааччы Юрий Дьяконов, Саха Өрөспүүбүлүкэтин физическэй култуураҕа уонна маассабай спорка управлениетын начаалынньыга Роман Оконешников, Саха Өрөспүүбүлүкэтин волейболга Федерациятын  президиумун бэрэссэдээтэлэ, Ил Түмэн дьокутаата Владимир Чичигинаров, Федерация толорооччу дириэктэрэ Күннэй Попова, Нам улууһун физическэй култуураҕа уонна спорка управлениетын начаалынньыга Павел Иванов, Нь.С. Тимофеев аатынан спортоскуола дириэктэрэ Василий Винокуров, сүрүн судьуйа Анатолий Чемерзанскай күрэхтэһии кыттыылаахтарын, көрөөччүлэри  эҕэрдэлээтилэр.

Саха сиригэр бастакы волейболга күрэхтэһиилэр 1940 сыллаахха тэриллэннэр, бүгүн спорт маассабай көрүҥүнэн буолбута, волейболистар кэккэлэригэр 30 тыһ.киһи  түмсэрин, 2015 сылтан күрэхтэһиилэр лигаларынан ыытыллалларын, хоту улуустар кытталлара, волейболистар оонньуур маастарыстыбалара үрдээн иһэрэ бэлиэтэннэ. Өрөспүүбүлүкэ эр дьоҥҥо сүүмэрдэммит хамаандата Благовещенскай куоракка түмүктэммит Уһук Илин Кубогар бастакы миэстэни ылбыта улахан ситиһии быһыытынан сыаналанна. Хамаанда аатыттан Сергей Голоков харда тыл эттэ.

Владимир Чичигинаров Сахаларын сирин соргулаахтык ааттаппыт хамаанда волейболистарыгар Сергей Голоковка (Таатта-Ханалас), Олег Малышевка (Таатта), Айтан Кириллиҥҥэ (Сунтаар-Мэҥэ Хаҥалас), Тимур Стручковка (Дьааҥы), Намтан Данил Лисачевка, Денис Осетровка, Андриан Григорьевка, Кирсан Эверстовка, Айтал Шишигиҥҥэ уонна тренер Айсен Жерготовка Махтал сурук уонна спортивнай форма ылыналларыгар сертификат туттарбыта дохсун ытыс тыаһынан доҕуһуолланна.

Пресс-конференция

Күрэхтэһии быыһыгар Благовещенскай судаарыстыбаннай педагогическай университетын аһаҕас Кубогын кыайыылаахтарын кытта пресс-конференция тэрилиннэ. Волейбол Федерациятын президиумун бэрэссэдээтэлэ, сүүрбэ сыл хирург-бырааһынан үлэлээн,  үгүс дьону үрүҥ тыыннарын өрүһүйбүт, “Туймаада” волейболун кулуубун оонньооччута, турникка 12-16 тардынар “Тардыныы бөлөх” көхтөөх чилиэнэ, чөл олох аргыстаах Владимир Чичигинаров салайан ыытта.

Волейболистар – быһааччы (доигровщик) Денис Осетров, көмүскээччи Данил Лисачев, сибээстээччи (связующай) Кирсан Эверстов “бастыырга эрдэттэн эрэллээхтэрин, финалга Амурскай уобалас хамаандатыгар 0:2 хотторон иһэннэр, хомунаннар, тахсыылаахтык оонньооннор, мүччүргэннээх киирсиигэ 3:2 кыайбыттарын, “Лондонскай финал буолла” дэппиттэрин, Благовещенскайга олорор, үөрэнэр биир дойдулаахтара, “Кыталык” түмсүү устудьуоннара ыһыытаан-хаһыытаан улаханнык өйөөн көмөлөһөннөр, саала иһэ бүтүннүү “Саха” хамаандатыгар ыалдьыбытын, атын хамаандалар волейболистарын кытта хаартыскаҕа түһүспүттэрин, билсибиттэрин, доҕордоспуттарын кэпсээтилэр.

Нам спортоскуолатын иитиллээччилэрин үрдүк таһымҥа таһаарары ситиспит улахан дьоҕурдаах уонна сатабыллаах тренерэ, Саха Өрөспүүбүлүкэтин сүүмэрдэммит хамаандатын сүрүн тренеригэр тиийэ үүммүт Айсен Ельфидифорович Жерготов “профессиональнай волейбол баар буолуохтааҕын туһунан былааннаахтарыттан” бэйэтин этиитин саҕалаата. “Арассыыйа үрдүкү лигатыгар тахсар сыал-сорук турарын, Саха Өрөспүүбүлүкэтин Бырабыыталыстыбатын бэрэссэдээтэлин солбуйааччылар Дьулустаан Борисов, Сергей Местников этиилэрэ олоххо киллэриллэллэригэр эрэллээхтэрин, 190 см тахса уһун волейболист уолаттар элбээн иһэллэрин, дойду регионнарыттан үрдүктэринэн хаалсыбаттарын, Арассыыйа волейболистара аан дойдуга күүстээхтэринэн ааҕыллалларын, олимпийскай оонньууларга түөрт иһиттэн түспэттэрин, ыччаттар аан дойдуга бастыылларын, Уһук Илиҥҥэ ситиһии өрөспүүбүлүкэ оҕолоругар, спортоскуолаларга стимул үөскүүрүгэр тиэрдэрин, Саха сириттэн тахсарга ыарахаттары аахсыбакка, үүнэргэ-сайдарга кыахтар баалларын, онуоха Федерация, спорт министиэристибэтэ үлэни ыыталларын, махтанарын” иһитиннэрбитэ биһирэннэ.

Нь.С. Тимофеев аатын сүгэр Нам олимипийскай эрэллэр спортоскуолатын дириэктэрэ Василий Винокуров “спортоскуола волейболга эппиэтинэстээҕин, Уһук Илиҥҥэ кыайыы алҕас кэлбэтэҕин, уон сыллаах үлэнэн ситиһиллибитин, интернат баара буоллар, өрөспүүбүлүкэттэн дьоҕурдаах оҕолору мунньуохтарын сөбүн, Федерация өйүүрүн, спонсордар баалларын, кинилэргэ махтанарын, Арассыыйаҕа тахсарга путевканы ыларга үлэ барарын”; спортоскуоланы тэрийсибит бастакы дириэктэр, билигин култуура управлениетын начаалынньыгынан үлэлиир Семен Ядрихинскэй историяны ахтан ыларыгар, “уон сыллааҕыта волейбол отделениетын тэрийэргэ быһаарыы ылыллыбытын, волейбол тахсыбат спорт көрүҥэ диэн мөккүөр үөдүйэ сылдьыбытын, госкомспорт бэрэссэдээтэлэ М.Д. Гуляев сөптөөх быһаарыы ылбытын, оҕолору кытта үлэлиир дьоҕурдаах тренердэр анаммыттарын, Айсен Жерготовтыын хамаанданы илдьэ Благовещенскайга тиийэ массыынанан күрэхтэһэ сылдьыбыттарын, Хабаровскайдарга хоттороннор, кыһыы-аба буолбутун, Айсен тренер быһыытынан кыайыыга дьулуурдаахтык, кыаҕын толору биэрэн үлэлиирин” эттилэр.

Саха Өрөспүүбүлүкэтин физическэй култуураҕа уонна маассабай спорка Управлениетын сытыы-хотуу начаалынньыга Роман Оконешников “маассабас баарын, маастарыстыбаҕа үлэни күүскэ ыытарга уолдьаспытын, үрдүк таһымтан кыайыы психологията, сайдыы өйө-санаата киирэрин, Арассыыйа үөрэнээччилэрин спартакиадатыгар ситиһиилээхтик кыттар наадатын, волейбол оскуолалара Намҥа уонна Чурапчыга көдьүүстээхтик үлэлииллэрин, сүүмэрдэммит хамаанда орто сааһа 20 сааска тэҥнэһэрэ кэскили көрдөрөрүн” тустарынан бэлиэтээтэ.

Бастыҥнар – үрдүкү лигаҕа

Былаһааккаҕа болҕомтону тардар интэриэһинэй киирсиилэр буоллулар. 1-кы лига оонньооччулара дьиҥ волейбол бырааһынньыгын бэлэхтээтилэр. Хамаандалар састааптара сүрдээҕин эдэрсийбит. Уһун волейболист уолаттар бэрт чэпчэки, сылбырҕа, имигэс хамсаныыларынан салгыҥҥа үөһэ уһулута күөрэйтэлээн тахсыталыыллар, самнарыылаах  охсуулары, “блоктары”, “албыннааһыннары” хото көрдөртөөтүлэр. Өрөспүүбүлүкэ сүүмэрдэммит хамаандатын волейболистарын оонньуутун көрөөрү саала туолан ньиргийэн олорбута үчүгэй буолла. Харахпытын араарбакка көрөммүт, улаханнык астынныбыт. Нам волейболистара тиэхиньикэлэрэ чочуллубута, кыраһыабай оонньуулара сүргэни көтөхтө. Кирсан Эверстов мээчиги хайа да балаһыанньаттан “олордон”  туруорарын, мээчиги былаһаакка “аһаҕас миэстэтигэр” түһэрэрин, Бочууров эҥкилэ суох күүстээх “подачата”, хаҥас илиитинэн сытыытык охсоро, Денис Осетров сытыы охсуутунан мээчиги “тоһоҕолоон” кэбиһэрэ, Данил Лисачев комбинацията, Андриан Григорьев “саба баттыыр блога” уо.д.а. эриэккэс оонньуулара өрөспүүбүлүкэ волейболга оскуолата сайдан иһэрин, инникилээҕин чаҕылхай көстүүлэринэн буоллулар.

Финалга Нам уонна Мииринэй хамаандалара утарыта көрүстүлэр. Кыайыы туһугар дьүккүөрдээх, сытыы тактическай комбинациялардаах абытай киирсиигэ Намнар күүстээх утарсааччыларын 2:0 баһыйаннар, 1-кы лига чөмпүйүөннэринэн буоллулар. Уһук Илин чөмпүйүөннэринэн буолбуттарын итэҕэттилэр. Үрдүкү лигаҕа таҕыстылар. Үһүс бириистээх миэстэҕэ Уус-Майа хамаандата тигистэ.

Уһулуччу үчүгэй оонньуулары көрдөрбүт волейболистар анал ааттарынан биһирэннилэр: “Бастыҥ көмүскээччи” – Андриан Григорьев (Нам), “Бастыҥ быһааччы” – Данил Воронцов (Мииринэй), “Бастыҥ оонньооччу” – Денис Осетров (Нам), “Бастыҥ ситимнээччи” – Андрей Филиппов (Уус-Майа). Кыайбыт уонна бириистээх миэстэҕэ тиксибит хамаандалар кубоктарынан, мэтээллэринэн, дипломнарынан  наҕараадаланнылар.

1-кы лига чемпионатын түмүгүнэн Нам уонна Мииринэй хамаандалара үрдүкү лигаҕа таҕыстылар. Эҕэрдэлиибит! Волейболистарбыт ситиһиилэринэн үөрдэ турдуннар!