«ВОИН» Киин Саха сиригэр сайыҥҥы үөрэҕи ыытар

РФ «ВОИН» Киинин Саха сиринээҕи салаата ыам ыйын 15 күнүттэн “Эдэр дьоруойдар кэмнэрэ” диэн босхо дьарыктыыр байыаннай-спортивнай симиэнэни арыйда. Манна 14-17 саастаах оҕолор сылдьаллар. Покровскайдыыр суолунан баран истэххэ баар, сайынын үлэлиир чэбдигирдэр “Энергетик” лааҕыр базатыгар тэрийбиттэр. 72 академическай чаастаах симиэнэ 14 күн устата салҕанар. Онно кэнэҕэһин Аҕа дойдуну көмүскүөхтээх ыччат билиитин, үөрүйэхтэрин байытар, сайыннарар, спордунан дьарыктаныыны уонна айар-тутар баҕаны көҕүлүүр сыаллаах үөрэхтэр, дьарыктар буолуохтара.

Быһааралларынан, бу «ВОИН» Киин бэрэсидьиэн Владимир Путин сорудаҕынан 2022 сыллаахха ахсынньы 1 күнүгэр тэриллибитэ. Бу Киин Аҕа дойдуга бэриниилээх, дойду көмүскэлигэр бэлэм, дириҥ билиини, үөрүйэҕи баһылаабыт саҥа көлүөнэ гражданнары иитэн-такайан таһаарар үрдүк миссиялаах.

«ВОИН» Киин дириэктэрэ Дмитрий Шевченко салайааччылаах педагогтар сэбиэттэрин мунньаҕа буолбут. Онно сайыҥҥы байыаннай-паториотическай симиэнэ курсаннарын үөрэтэргэ сөптөөх саҥа 14 үөрэх бырагырааматын бигэргэппиттэр. Ити көҕүлээһин Саха сиригэр эмиэ олоххо киирэр буолбут.

Бу иннинэ “Эдэр дьоруойдар кэмнэрэ” диэн 72 чаастаах кэлим бырагыраама баара. Оттон билигин ол элбэх таһымнаах, тус-туһунан хайысхалаах 14 араас бырагыраҕа диэри кэҥээбит. Бу барыта эдэр дьон тактическай уонна байыаннай бэлэмнэниини дириҥэтэн баралларыгар, тыыннаах хаалыы төрүттэрин, разведка, бастакы көмөнү оҥоруу сатабылларын баһылыылларыгар, мэдиссиинэҕэ быһаарсар буолалларыгар көмөлөһүөхтээх эбит. Ону тэҥэ оҕолор FPV-дроннары салайа үөрэниэхтэрэ,   снайпинг үөрүйэхтэрин баһылыахтара.

“Бу иннинэ биһиэхэ оҕолору чэбдигирдэр лааҕырдарга анаммыт биир эрэ бырагыраама баара.  Оттон билигин  бырагыраама ахсаанын биллэ хаҥаттыбыт. Маннык дьаһаныы оҕолор биир сүрүн, тирэх кууруһу ааһан баран, салгыы сэргээн, сэҥээрэн, эбии билиини ылар интэриэстэрин көҕүлүөхтээх. Киин көхтөөх филиаллара киллэрбит этиилэригэр олоҕуран, уруккутааҕар сонун тутулу (структураны) тэрийдибит.  Биһиги билигин “Эдэр дьоруойдар кэмнэрэ. Бастакы таһым” уонна “Эдэр дьоруойдар кэмнэрэ. Иккис таһым” диэн тирэх бырагыраамаланныбыт.  Ону таһынан тус-туһунан специализациялаах 12 профильнай бырагыраама эбилиннэ.  Хас биирдиилэрэ икки көрүҥ уустуктаах гына толкуйдаммыттар. Ол эбэтэр, 14 саҥа бырагыраама баар буолла”, – диэн, Госдуума дьокутаата, “ВОИН” Киин бырабылыанньатын бэрэссэдээтэлэ, ЛНР дьоруойа Виктор Водолацкай быһаарбыт.

Саҥаны киллэрии сүрүн сыала – “ВОИН” Киин  эргийэр киинигэр курсаннар уһун кэмнээх интэриэстэрин тардыы, кинилэр талан ылбыт хайысхаларыгар маастарыстыбалара сайдан иһэрин ситиһии буолар.

Бу саҥа тиһик оҕолор байыаннай-прикладной үөрүйэҕи биэстэн ордук сыл устата сыыйа-баайа дириҥэтэн үөрэтэн, толору баһылыылларын ситиһиэхтээх.  Алын таһымтан саҕалаан, дириҥник үөрэтэн, хас да кэмпитиэнсийэни баһылаан тахсыахтаахтар. Хас биирдии бырагыраамаҕа спортивнай бэлэмнэнии булгуччулаах блога диэн баар. Түмүгэр бигэргэммит нуоруманы толороллоро ирдэнэр.

Байыаннай-прикладной үөрүйэҕи баһылыылларын таһынан, симиэнэҕэ сылдьар оҕолор дойду историятын уонна дойдубутугар олоҕурбут сиэр-майгы, духуобунас сыаннастарын үөрэтэллэр. Бырагыраама чэрчитинэн, оҕолор араас култуурунай тэрээһиннэргэ сылдьаллар, “ВОИН.Кино” бырайыак чэрчитинэн, патриоттуу тыыннаах киинэлэри көрөллөр, Арассыыйа дьоруойдарын, СВО бэтэрээннэрин кытта көрсүһэллэр.

Хас биирдии симиэнэҕэ “Арассыыйа Федерациятын Сэбилэниилээх күүстэрэ 2022-2026 сс. Анал байыаннай дьайыыга” диэн дьарык былаанныммыт. Ону таһынан Михаил Тимофеевич Калашников сырдык кэриэһигэр “Калашников кэмэ” диэн ааттаах тэрээһиҥҥэ ММГ АК-12 автоматы ыһарга-хомуйарга (толору ыһыы буолбатах) аһаҕас турнирга кыттыахтара.

Саха сиригэр 1-кы симиэнэ бэс ыйын 24 – от ыйын 7 күннэригэр тэриллэр. Иккис симиэнэ от ыйын 17 күнүттэн от ыйын 31 күнүгэр диэри буолар.

Сайаапкалары үөрэх управлениелара, үөрэх тэрилтэлэрэ (испииһэк түһэрэллэр), төрөппүттэр (биирдиилээн оҕонон) туттараллар. Ону тэҥэ Судаарыстыбаннай өҥө порталын нөҥүө тиксэриэххэ сөп.

Лааҕырга киирэргэ наада:

- Оҕо уонна төрөппүт пааспарын куопуйалара.

- Оҕо СНИЛС-а.

- 079/076-у халыыптаах ыспыраапка.

- Быһыы ылбыты бэлиэтиир Сэртипикээт.

- Страховка,

- Киин биэрбит докумуоннарын толорон туттарыы.

Манна даҕатан  2025 сылга “ВОИН” бырагырааматыгар 13 тыһ. тахса курсант кыттыбыта суруллар. Бу – 2024 сыллаахха дьарыктаммыттардааҕа 15 бырыһыанынан элбэх. Оттон “ВОИН” Киин тэриллиэҕиттэн уопсайа 35 тыһыынча уол, кыыс дьарыктаммыт.

 Бу туһунан АГиП пресс-сулууспата суруйар.