"Водянова былаһаакката" оҕо аймаҕы тупсан көрүстэ

Бэлиэтээн эттэххэ, эбийиэк Арассыыйа Бэрэсидьиэнэ Владимир Путин көҕүлээбит «Олох инфраструктурата» национальнай бырайыак «Куорат табыгастаах эйгэтин тэрийии» федеральнай бырайыак чэрчитинэн саҥардылынна.

Олохтоох дьаһалта пресс-сулууспата иһитиннэрбитинэн, былаһаакка инженернэй инфраструктурата барыта уларыйбыт. Эргэ олоҕо көтүрүллэн, ол оннугар үйэлээх буоларын туһугар эбии арматуралаах бетон ууруллубут. Аныгылыы билиитэ бүрүөһүн тэлгэтиллибит. ГОСТ ирдэбилигэр эппиэттиир саҥа оонньуур комплекстар турбуттар.

Соторутааҕыта Дьокуускайга федеральнай бүддьүөттэн эбии үп көрүллүбүт, онон өссө биир улахан оонньуур комплекс туруохтаах. Эһиил былаан быһыытынан манна скейт-былаһаакка оҥоһуллуохтаах. Бу бырайыагы олоххо киллэрэр инниттэн куорат дьаһалтата нэһилиэнньэни Бүтүн Арассыыйатааҕы уопсастыбаннай туоналары тупсарар аналлаах онлайн куоластааһыҥҥа көхтөөхтүк кыттаргытыгар ыҥырар.

Дмитрий Садовников, Дьокуускай куорат баһылыга: «Бу былаһаакканы арыйыы – биһиги Куорат күнүн көрсө Саха сирин олохтоохторугар кыра эрээри, суолталаах бэлэхпит. Куорат хас биирдии түөлбэтэ оҕолоох дьиэ кэргэттэргэ табыгастаах буоларын туһугар утумнаах үлэ ыытыллар. Национальнай бырайыактарга кыттан, куораппытын, олохтоох бүддьүөккэ ноҕурууска оҥорбокко, уларытар кыахтаахпыт. Сотору кэминэн манна хамсаныылаах оонньууларга аналлаах өссө биир бөдөҥ комплекс баар буолуоҕа. Оҕолорбут доруобай, туйгун үөрэхтээх, өрөспүүбүлүкэбит уонна дойдубут дьоһуннаах олохтоохторо буола улааттыннар!»

СӨ Ил Дарханын иһинэн Архитектура уонна куораты тутуу управлениетын салайааччыта Любовь Папок эбийиэги саҥардыы элбэх бэлэмнэнии үлэтин эрэйбитин, тас өттүттэн судургу курдук гынан баран, ис-иһигэр уустук инженернэй бэлэмнэниини ирдээбитин, "Куорат табыгастаах эйгэтин тэрийии" федеральнай бырагыраама көмөтүнэн билиитэни саҥардыы, ону таһынан хаачыстыбалаах оонньуур оборудованиены атыылаһар кыахтаммыттарын бэлиэтээн эттэ. Итиэннэ киин куорат олохтоохторун Таалай күөл сайдыытыгар өйөбүл буоларгытыгар, тупсарыыга куоластыыргытыгар ыҥырда.