Водоканаллар конференциялара ыытыллыаҕа

Тэрээһин Арассыыйа уунан хааччыйар уонна ууну аһардар ассоциациятын көҕүлээһининэн, СӨ Бырабыыталыстыбатын өйөбүлүнэн ыытыллар, диэн “Водоканал” АУо пресс-сулууспата иһитиннэрэр.

Конференцияҕа РФ Тутуу министиэристибэтэ, Айылҕа министиэристибэтэ, Федерация Сэбиэтин профильнай кэмитиэттэрэ, дойду 50-ча куораттарыттан водоканаллар испеисэлиистэрэ, ОДьКХ эйгэтин экспертэрэ кэлиэхтэрэ. Быйыл бу конференция Уһук Илин регионугар төрдүс төгүлүн ыытыллар. Кыттааччылар Саха сирин тыйыс усулуобуйатыгар водоканал хайдах үлэлиирин көрүөхтэрэ-истиэхтэрэ, уопут атастаһыахтара, ууну оборторор тутууларга сылдьыахтара, Жатайга баар канализационнай ыраастыыр станция үлэтин билсиэхтэрэ.

Атрыдьах ыйын 19-20 күннэригэр өрөспүүбүлүкэ салалтата, сенатордар уонна федеральнай биэдэмистибэлэр бэрэстэбиитэллэрэ кыттыылаах пленарнай мунньах ыытыллыаҕа. Ону таһынан инфраструктураны сайыннарыы, ситимнэри саҥардыы, сокуоҥҥа олоҕуран үлэни ыытыы, сыыппара технологияларын киллэрии тула төгүрүк остуоллар буолуохтара.