«Водоканал» тэрилтэ үлэһиттэрэ Олохтоох дьаһалта 2024 сыллааҕы үлэтин үчүгэйинэн сыаналаатылар

Олунньу 19 күнүгэр куорат баһылыга Евгений Григорьев «Водоканал» АУо кэлэктиибин иннигэр отчуоттаата.
Олохтоох дьаһалта ааспыт сыллааҕы үлэтин уонна үүммүт 2025 сылга былааннарын тула отчуот кэнниттэн «Водоканал» тэрилтэ тустаах үлэтин-хамнаһын тула кэпсэтии буолла.
Ол курдук, 2024 сыллаахха куорат 3 №-дээх коллектора уонна чааска 1500 куб. м иэннээх ууну хачайдыыр кыамталаах 5 №-дээх узел үлэҕэ киирбиттэрэ бэлиэтэннэ. Уунан хааччыйыы хайысхатыгар Маҕан бөһүөлэгэр  бырайыактыыр-чинчийэр үлэлэр ыытыллыбыттара, бырайыак-смета докумуоннара оҥоһуллубута, Белое озеро уонна Марха оройуоннарын уунан хааччыйар бырайыак докумуона оҥоһуллара ыйылынна.
«Водоканал» тэрилтэ үлэһиттэрэ куораты уунан хааччыйар, ууну аһардар ситимнэри саҥардар, тэрилтэ дьиэтигэр доруобуйаларын хааччахтаах абоненнарга анаан пандус тутуллар наадатын ыйдылар. Маны сэргэ сир учаастактарын көҥүлэ суох баһылааһын, «Тускул» түөлбэни гаастааһын, «Севернай» дьоҕус түөлбэҕэ сир учаастактарын биэрии боппуруостарын туруордулар. Дьон олорор кыбаарталларыгар ыарахан уйуктаах тиэхиньикэни туруорары, үөрэх кыһаларын, олорор дьиэлэр тастарыгар арыгынан эргиниини бобору туруорустулар. Уопсастыбаннай тырааныспар боппуруоһугар сыһыаннаан Сэбиэскэй Аармыйа 50 сыла уулусса өрөмүөнүн, 1 №-дээх оптуобус үлэтин ыйыталастылар, диэн иһитиннэрэр Олохтоох дьаһалта пресс-сулууспата.