Владимир Путин Аҕыйах ахсааннаах норуоттар уонна Арассыыйа норуоттарын тылларын күннэрин олохтоото

Норуот сомоҕолоһуутун күнүн чэрчитинэн сэтинньи 4 күнүгэр дойду баһылыга Владимир Путин ордук биһиэхэ, национальнай өрөспүүбүлүкэҕэ уонна кини киин куоратыгар быһаччы сыһыаннаах икки дьоһун суолталаах, чуолаан култуура нэһилиэстибэтин, ол иһигэр тылбытын харыстыырга туһуланар ыйаахтары баттаата.
Ол курдук, Владимир Путин ыйааҕынан мантан ыла Арассыыйа аҕыйах ахсааннаах төрүт олохтоох норуоттарын уонна Арассыыйа норуоттарын тылларын күннэрэ диэн икки бырааһынньык баар буолла.
Арассыыйа аҕыйах ахсааннаах төрүт олохтоох норуоттарын күнэ дойду үрдүнэн муус устар 30 күнүгэр бэлиэтэниэҕэ, оттон балаҕан ыйын 8 күнүгэр – Арассыыйа норуоттарын тылларын күнэ.
Ол туһунан Ил Дархан уонна Бырабыыталыстыба пресс-сулууспата иһитиннэрэр.

Хаартыска: Мария Васильева