Владимир Членов аатынан истипиэндьийэлэри туттардылар

Алтынньы 14 күнүгэр Дьокуускайга Саха сирин биллиилээх уопсастыбаннай уонна политическай диэйэтэлэ Владимир Членов төрөөбүтэ 75 сылыгар аналлаах тэрээһиннэр ыытылыннылар.

Бу күн Владимир Членов аатын үйэтитэр мемориальнай дуоскаҕа сибэкки дьөрбөтүн ууруу сиэрэ-туома ыытылынна. Тэрээһиҥҥэ Владимир Михайлович уолаттара Михаил уонна Юрий Членовтар, үөлээннээхтэрэ, кэллиэгэлэрэ, тырааныспар эйгэтин бэтэрээннэрэ уонна үлэһиттэрэ кыттыыны ыллылар.  

Эмиэ бу күн тырааныспар салаатын бастыҥ устудьуоннарыгар уонна  преподавателлэригэр Владимир Членов аатынан истипиэндьийэлэри үөрүүлээх быһыыга-майгыга туттарыы буолан ааста.

Быйыл бу бириэмийэни ыллылар: Дьокуускайдааҕы тырааныспар техникумун устудьуоннара Дмитрий Фетисов, Валерий Хастаев, Дмитрий Малюгов уонна преподаватель Прокопий Егоров; Дьокуускайдааҕы индустриальнай-педагогическай колледж киэн туттар устудьуоннара Емельян Карташев, Сергей Севостьянов, Рустам Калинин, преподавателлэр Владимир Колодезников уонна Кирилл Сысоев; Дьокуускайдааҕы автодорожнай техникум устудьуоннара Максим Аммосов, Харысхан Габышев, Никону Иванов уонна производственнай үөрэтии маастара Алексей Николаев.

Бэлиэтээн эттэххэ, Владимир Членов өрөспүүбүлүкэҕэ тырааныспар тиһигэ уонна суол-иис инфраструктурата сайдарыгар үтүөтэ-өҥөтө сүҥкэн улахан. Владимир Михайлович – “Хотугу сулус” уордьан кавалера, “Гражданскай килбиэн” бочуот бэлиэтин хаһаайына, Саха сирин норуотун хаһаайыстыбатын үтүөлээх үлэһитэ, Арассыыйа тырааныспарын бочуоттаах үлэһитэ, Булуҥ улууһун бочуоттаах гражданина.

Кини аата “Саха сирин тимир суоллара” хампаанньа локомотивыгар уонна “Полярные авиалинии” авиахампаанньа Ми-8 МТВ бөртөлүөтүгэр иҥэриллибитэ.

Тырааныспар уонна суол-иис хаһаайыстыбатын миниистирэ Владимир Сивцев иһитиннэрбитинэн, инникитин Дьокуускай уулуссатыгар Владимир Членов аата иҥэриллиэҕэ.  

Хаартыска: Нарыйа Пахомова, СИА