Уунан хааччыйыы уонна канализация тиһиктэрин сайыннарыы – болҕомто киинигэр

Кэпсэтии биир сүрүн тиэмэтинэн бас билээччитэ суох ситимнэри көрүү-истии туһунан буолла. Онуоха олору тутарга уонна өрөмүөннүүргэ үбү-харчыны тыырар кыаҕы ырытыстылар.

Салайааччылар ураты болҕомтолоро канализация насоснай ыстаансыйаларыгар (КНС)  уурулунна. Дьокуускайга маннык 34 эбийиэк баар, исписэлиистэр этэллэринэн, кинилэр тэхиньиичэскэй туруктара улахан кутталы үөскэтэр. Инникитин КНС-тары толору учуоттааһыны ыытыы былааннанна – бу чөлүгэр түһэрэр тэрээһиннэри былаанныырга төрүт буолуоҕа.

Инники кэскиллээх бырайыактартан биирдэстэрэ – төрдүс коллекторы оҥоруу. Ол тутулла турар «Спортивнай»  кыбартаал уонна Бүлүүлүүр суол устун дьэндэһэр саҥа дьиэлэр канализацияларын кыһалҕатын быһаарыаҕа.

Маны таһынан, Марха дьоҕус түөлбэтигэр коллектор бырайыагын оҥорууга үлэ салҕанара бигэргэтилиннэ.

Мунньах түмүгүнэн куорат хомунаалынай инфраструктуратын сайыннарыыга бииргэ үлэлэһиини салгыыр туһунан сүбэлэстилэр. Былааннаммыт бырайыактары олоххо киллэрии Дьокуускайга олоҕу-дьаһаҕы хааччыйар тиһиктэри эрэлээхтик үлэлэтэргэ тирэх буолуоҕа уонна куорат салгыы сайдарыгар усулуобуйа тэриллиэҕэ.