Уулуссаларга өрөмүөн

2025 сылга Дьокуускайга «Олох инфраструктурата» национальнай бырайыак чэрчитинэн 11 уулуссаҕа уопсайа 15 км тахса уһуннаах суол өрөмүөннэнэрэ былааннаммытын туһунан эрдэ суруйан турабыт. Олортон билигин сорохторо хайыы-үйэ аспаалланан бүппүттэр.

Күн бүгүн Хабаров уулуссатыгар тиэхиньикэ тохтоло суох үлэлиир. «Автодор» РИК АУо өрөмүөннүүр-тутар учаастагын начаалынньыга Александр Алексеев «Вести Саха» ханаалга кэпсээбитинэн, ааспыт нэдиэлэҕэ уулусса алын араҥатын аспааллааһын түмүктэммит. Бу нэдиэлэҕэ аспаал-бетон иккис араҥата тэлгэниэхтээх. Оттон үһүс араҥа аспаалы кэлэр сылга былаанныыллар. Үһүс араҥаны Ярославскай аатынан уулуссаттан Богатырев уулуссатыгар диэри кэрчиккэ тэлгиэхтэрэ.  

Билигин сүрүн үлэ Ярославскай уулуссаттан Чиряевка диэри учаастакка ыытыллар. Манна ууну ыытар лотоктары таҥыы, бордюр таастарын туруоруу, ону тэҥэ тротуардары тутуу үлэтэ барар. Сатыы дьон сылдьар сирэ ордук табыгастаах гына оҥоһуллара, сорох сирдэринэн 3,5 м иэннээх буола кэҥэтиллэрэ, плитка тэлгэнэрэ былааннанар.

Оттон Петр Алексеев аатынан уулуссаҕа газопровод утаҕа тардыллан бүппүт. Билигин сатыы дьон сылдьар сирин чөлүгэр түһэрии, ону тэҥэ суолу аспааллааһыҥҥа бэлэмнэнии үлэлэрэ ыытыллаллар. Аҕыйах хонугунан манна аспаалы тэлгээн саҕалыахтара.

Хаартыска: Дьокуускай уокуруктааҕы дьаһалтатын сайтыттан