«Уулуссаҕа сылдьар дьоҥҥо төлөпүөҥҥүтүн биэримэҥ»!

Интэриниэккэ дьон үтүө санаатынан туһанар, сирэйдэрин уонна куоластарын уоран, кирэдьиит ылар туһугар албынныыр «култууралаах көрдөһөөччүлэр» тустарынан иһитиннэрии тарҕаммыт.

Мессенджердэргэ, социальнай ситимнэргэ уонна сонуннар бөлөхтөрүгэр уулуссатааҕы саҥа албыннааһын туһунан сэрэтиилэр маассабайдык тарҕаналлар. «Кинилэргэ харчыгыт, парольгут эбэтэр итэҕэлгит наадата суох, эйэҕэс майгыҥ наада», — диэн суруйаллар.

Албыҥҥа түбэспит киһини төлөпүөнүн "настройкалаан" биэрэригэр көрдөһүөхтэрин сөп. Холобур, сиэртибэҕэ биэнсийэтин кээмэйин бэрэбиэркэлииргэ, алҕас арыллыбыт страницаны сабарга эбэтэр сыһыарыы тоҕо үлэлээбэтин быһаарарыгар.

«Эн төлөпүөнү илиигэр ыллаххына, видеозвонок, экран устуута эбэтэр сирэйи билэр функция холбонон турар буолар. Атын сиртэн ким эрэ эн хас хамсаныыгын барытын кэтиир», — диэн ааптар быһаарар.

Иһитиннэриини тарҕатааччылар маны «оҥоһуу өй көмөтүнэн оҥоһуллубут биометрическай афера» диэн ааттыыллар. Кинилэр этэллэринэн, киһи экраны таарыйдаҕына — тарбах суола, сыыппаралары уонна кодтары аахтаҕына — куолаһа, камераҕа көрдөҕүнэ сирэйин хаартыскаҕа устан ылаллар. Онон түөкүттэр үс биометрическай күлүүһү ылан, сымыйа цифровой клон оҥорон, кирэдьиит оҥорторуохтарын сөп диэн сабаҕалыыллар.

Онон:

Билбэт дьон төлөпүөннэрин тыытыма, баттаама, экраны көрүмэ, сыыппаралары уонна кодтары саҥарыма.

Билбэт нүөмэртэн кэлбит видеозвоноктары ылыма, камераҕа көрүмэ уонна тугу да улаханнык саҥарыма.

Баан пресс-сулууспата эппитинэн, түөкүттэртэн харыстанарга төлөпүөн экранын скриншоттан харыстыыр сервистэр уонна нүөмэри быһаарар определитель көмөлөһөллөр.

Полиция ону сэргэ санатта: баан уонна быраабы араҥаччылыыр уорганнар хаһан да каарта даннайдарын, бигэргэтэр кодтары ыйыталаспаттар, кирэдьиит ыларга эбэтэр харчыны ыытарга көрдөспөттөр уонна мессенджердэр нөҥүө эрийбэттэр. Сэрэхтээх кэпсэтиини тута бүтэриҥ уонна счеккут куттала суоҕун бэрэбиэркэлиир туһугар бэйэҕит бааҥҥа эрийиҥ.