Утуу-субуу үс бырааһынньык

Сыл аайы ыам ыйын 21 күнүгэр Ырыа күнүн бэлиэтиибит. Быйыл «Cаха» НКИХ быһа эпиирдэри ыытыаҕа, улуустарга киэҥ далааһыннаах тэрээһиннэр буолуохтара. Бу туһунан култуура уонна духуобунай сайдыы миниистирин бастакы солбуйааччы Мария Турантаева  «Актуальное интервью» биэриигэ кэпсээтэ.

Былырыыҥҥы Сайылык күнэ, "Киин куорат" архыыбыттан

Ыам ыйын 22 күнүгэр, Сайылык күнүгэр, киин куорат олохтоохторун уонна ыалдьыттарын Орджоникидзе болуоссатыгар  сэргэх тэрээһиннэр күүтэллэр.

Ол курдук, күнүс 13:00 чаастан киэһэ 19:00 диэри маастар-кылаастар, көрдөөх-нардаах оонньуулар, быыстапкалар, олохтоох оҥорон таһаарааччылар бородууксуйаларын атыыта, улахан кэнсиэр уонна хайыы үйэ үгэскэ кубулуйбут собону ыраастааһыҥҥа уонна куһу үргээһиҥҥэ норуот күрэхтэрэ буолуохтара.

Ыам ыйын 25 күнүгэр, Оһуохай күнүгэр, Култуура уонна сынньалаҥ пааркатыгар Оһуохай аллеятыгар ыччакка аналлаах «Куйаар далай түһүлгэ» оһуохайдьыттар өрөспүүбүлүкэтээҕи күрэхтэрин түмүктүүр түһүмэҕэ ыытыллыаҕа.

Кылаан кыайыылаахтары «идэтийбиттэр» уонна «саҥа саҕалааччылар» диэн тус-туһунан быһаарыахтара.

Бу күн Өрөспүүбүлүкэ болуоссатыгар ааттаах-суоллаах этээччилэр уонна араас күрэхтэр кыайыылаахтара кыттыылаах «Добун оһуохай» түһүлгэтэ тэриллиэҕэ.

Мария Турантаева иһитиннэрбитинэн, Оһуохай күнэ сыл аайы өрөспүүбүлүкэ үрдүнэн 15 тыһыынчаттан тахса киһини сомоҕолуур, оттон ыччат күрэҕэ былырыын 13 улуустан 2,5 тыһыынча кыттааччыны түмпүт.

Төрүт култуураны өрө тутар дириҥ ис хоһоонноох бырааһынньыктар туризм сайдарыгар төһүү күүс буолаллар, дойду араас эрэгийиэннэриттэн ыалдьыттары угуйаллар.

Түгэнинэн туһанан, «Киин куорат» быйыл сайыҥҥы сүрүн ыһыахтар буолар күннэрин-дьылларын санатар:

 Туймаада ыһыаҕа – бэс ыйын 27-28 күннэрэ, Дьокуускай;

Олоҥхо ыһыаҕа  – от ыйын 4-5 күннэрэ, Кэбээйи улууһа.