Утумун салҕыыр дьоннордоох

Кыайыы 80 сылынан

Ийэбит, эбэбит, хос эбэбит Пелагея Дмитриевна Гаврильева 1919 сыллаахха Орджоникидзевскай оройуон Еланка нэһилиэгэр холкуостаах дьоҥҥо күн сирин көрбүт. Бииргэ төрөөбүттэр иккиэлэр, убайа Василий уонна кини.

Сэрии ыар сылларын Пелагея 22 сааһыгар көрсүбүт. Кини тыа маһын уунан ыытыыга үлэлээбит. Ийэбит бастакы кэргэнэ Лукин Дмитрий Михайлович Аҕа дойду Улуу сэриитигэр 1942 сыллаахха ыҥырыллан барбыт да, төннүбэтэх, онон 23 сааһыгар огдообо буолбут. Кэлин Соломонов Семен Петровичка кэргэн тахсан, 1965 сыллаахха саҥа холкуос бөҕөргөөн Улахан Ааҥҥа көһөн кэлбиттэр. Онно кэлэн өр сылларга ыанньыксытынан, бороон көрөөччүнэн, учуотчутунан биэнсийэҕэ тахсыар диэри үтүө суобастаахтык үлэлээбит, ол туоһутунан элбэх Бочуотунай грамоталар, өйдөбүнньүк суруктар буолаллар.

Киһи быһыытынан сүрдээх амарах, аһыныгас дууһалаах, үтүө санаалаах, киэҥ-холку майгылаах этэ. Иккис кэргэнэ эмиэ эрдэ өлөн, алта оҕолоох огдообо хаалбыт. Төһө да Дьылҕа Хаан тыйыһын иһин, ийэбит санаатын түһэрбэккэ, кытаанах киһи буолан, уһуну-киэҥи өйдөөн, оҕолорун иитэр иннигэр олорон, үлэлээн, соҕотох улаатыннартаабыт. Кыра уола 4-с кылааска үөрэнэ сырыттаҕына эдэр сааһыгар күн сириттэн күрэммит.

Билигин оҕолоро, сиэннэрэ өрөспүүбүлүкэ, нэһилиэк, улуус киэн туттар дьоно. Кинилэр истэригэр атыы-эргиэн, инженер, учуутал, быраас, тыа хаһаайыстыбатын үлэһиттэрэ бааллар. Пелагея Дмитриевна олоҕун оҕолоро, 17 сиэнэ, 45 хос сиэнэ салгыыллар.