Устудьуоннары өйүүр миэрэлэр

Алтынньы 1 күнүгэр Хотугулуу-Илиҥҥи федеральнай университекка устудьуон ыччакка анаан “Семья в молодости. Создать нельзя отложить” диэн интенсив-семинары стратегическай көҕүлээһин Агентствота тэрийэн ыытта. Саха сирин ХИФУ-га, үрдүк үөрэх уонна орто анал үөрэх кыһаларыгар үөрэнэр устудьуоннар дьиэ кэргэн сыаннастарын көрүүлэрин үллэһиннилэр, эдэр ыаллар туох социальнай уонна олох-дьаһах кыһалҕаларын көрсөллөрүн кэпсээтилэр.

Интенсив модераторынан стратегическай көҕүлээһиннэр Агентстволарын «Социальнай бырайыактар» хайысхатын дириэктэрин солбуйааччы Григорий Сайфуллин буолла. «Бу ыччаты кытта бииргэ үлэлээһин дьиэ кэргэни тэрийиигэ уонна сайыннарыыга наадалаах компетенциялары үөскэтиигэ инновационнай формат. Биһиги бэйэ икки ардыгар уонна дьиэ кэргэн сыһыаннаһыыларын кытта сибээстээх боппуруостары дьүүллэһэбит. Билиинэн, иһитиннэриинэн эрэ муҥурдаммакка, дьоллоох ыалы тэрийэргэ бэлэм буолуохтаахпыт", – диэн бэлиэтээтэ.

Григорий Сайфуллин демографияны үрдэтэр дьаһаллар, миэрэлэр төһө да баалларын иһин, статистика чахчыларынан, 100 дьиэ кэргэнтэн 83-һэ арахсыынан түмүктэнэрин тоһоҕолоон бэлиэтээтэ. Ыал арахсар, ыһыллар биричиинэлэрин ортолоругар семинарга кыттыбыт устудьуоннар: бэйэ-бэйэлэрин өйдөспөт буолуу, араас-араас интэриэстэр, сыаннастар, олох-дьаһах, материальнай кыһалҕалар, таҥнарыы уонна көссүүлэһии, дьиэ кэргэҥҥэ атаҕастааһыны ааттаатылар. Интенсивкэ оонньуу уонна интерактивнай көрүҥүнэн таптыы көрөртөн тапталга диэри сыһыан сайдыытын түһүмэхтэрин, тус сайдыы бырагыраамаларын ырыттылар, коммуникативнай сатабылларын уонна дьиэ кэргэн кэпсэтиини ыытар дьоҕурдарын туһаннылар.

ХИФУ устудьуоннар сайдыыларын Управлениетын салайааччыта Степан Слепцов эдэр ыаллары өйүүр дьаһаллар тустарынан кэпсээтэ. “ХИФУ ыччат политикатын сайыннарыы Бырагырааматын биир хайысхата – уһук хоту дойдуга устудьуон ыччат олорор эйгэтин хаачыстыбатын тупсарыы уонна үрдэтии, социальнай өҥөнү оҥорууну судургутутуу, устудьуон ыалларга табыгастаах усулуобуйаны тэрийии. Билигин 68 ыал биһиги университеппыт истиэнэтигэр үөрэнэ сылдьар уонна олоҕун оҥостор, 122 ийэ оҕолорун көрүүнү үөрэхтэрин уонна научнай үлэни кытта ситиһиилээхтик дьүөрэлии туталлар. Оҕолорун кытта олохсуйарга 18 №-дээх анал уопсай дьиэҕэ усулуобуйа тэриллэн, 47 устудьуон ыал олорор», – диэн кини билиһиннэрдэ.

Федеральнай университет ыал буолбут устудьуоннарыгар 18 №-дээх уопсай киэҥ-куоҥ блоктардаах уопсай ананар, манна ас астанарга аналлаах туһунан куукуналаах, санузеллаах уонна хас биирдии ыал уйалаахпын дэнэригэр туһунан киирии хостоох, дьиэ кэргэн ыытар дьоҕус биисинэһин өйүүр, үрдүк үөрэх психологическай көмөтүн Киинигэр дьиэ кэргэн консультацияларын анал бырагыраамата оҥоһуллубут. Устудьуоннар дьиэ кэргэн материальнай балаһыанньата ыараханынан сибээстээн ый ахсын материальнай көмөнү, хат буолууга уонна оҕо төрөөһүнүнэн сибээстээн биир кэмнээх көмөнү, «ЩИТ» ППОС юридическай көмө Кииниттэн консультациялары, оҕолорго анаан саҥа дьыллааҕы минньигэс бэлэхтэри ылыахтарын сөп.

Алтынньы бүтүүтэ университет «Мин дьиэ кэргэним – мин ХИФУ-м» Арассыыйа ыччатын куонкуруһугар кыайбыт бырайыагы олоххо киллэриини саҕалыаҕа диэн управление начаалынньыга иһитиннэрдэ. Бырайыак быһыытынан 9/1 №-дээх уопсай дьиэҕэ оҕо оонньууругар табыгастаах, элбэх хайысхалаах сир аһыллыаҕа, маастар-кылаастар, трениннэр тэриллэн, эдэр ыаллар бэстибээллэрэ ыытыллыаҕа.

СӨ Ил Дарханын иһинэн стратегическай көҕүлээһиннэр Агентстволарын регионнааҕы сервиснэй боломуочунайа Роза Егорова устудьуоннарга анаан «Арассыыйа дьиэ кэргэнин пааспара» пилотнай бырайыагы билиһиннэрдэ, бу дьиэ кэргэҥҥэ табыгастаах өҥө буолуоҕа, ол нөҥүө «Госуслуги» портал курдук олох араас балаһыанньаларыгар: хат буолууттан, оҕо төрүөҕүттэн, оҕо саадыгар уонна оскуолаҕа суруттарыыттан саҕалаан биэнсийэҕэ тахсыыга диэри көмөнү ылыахха сөп.

Хаартыска: www.s-vfu.ru