Устудьуоннар видео-оонньуулары оҥорон таһаарыыга үөрэнэллэр

«Дьокуускай» ИТ-пааркаҕа Арктикатааҕы култуура уонна искусство судаарыстыбаннай институтун үһүс кууруһун устудьуоннарыгар идэҕэ бэлэмниир бырагыраама бастакы ыйа түмүктэннэ.

Бырайыак «Цифровые кафедры» федеральнай көҕүлээһин иитинэн олоххо киирэр. Инникитин видео-оонньуулары оҥорон таһаарыыны баһылыахтаах 35 устудьуон геймдизайҥҥа, сценарий маастарыстыбатыгар уонна продюсированиеҕа уһуйулуннулар. 

ИТ-паарка дириэктэрэ Руслан Тыкушин иһитиннэрбитинэн, үөрэх бастакы түһүмэҕин сүрүн соруга – устудьуоннарга GameDev индустриятын биир кэлим өйдөтүү.

«Билигин геймдизайны, аниматор худуоһунньуктар уонна разработчиктар үлэлэрин бириинсибин үөрэтэбит. Хас биирдии устудьуон, баһылыахтаах идэтиттэн тутулуга суох, оонньууну оҥорон таһаарыы эргиирин ымпыгар-чымпыгар диэри өйдүөхтээх. Аныгыскы семестртэн талан ылбыт хайысхаларын дириҥник үөрэтэллэрин курдук бөлөхтөргө араарыахпыт», — диэн кэпсээтэ кини.

Хайыы үйэ ахсынньы бүтүүтэ үөрэх практическай чааһыгар киириэхтэрэ. Анал хакатоҥҥа кыттааччылар биэстии киһилээх сэттэ хамаандаҕа арахсыахтара, хас биирдии хамаанда оонньуу бырайыагын концепциятын айан таһаарар үлэтин саҕалыаҕа.

«Биһиги сыалбыт — устудьуоннар үөрэхтэрин бүтэрэллэрин саҕана айан таһаарааччылар дохуот киллэринэллэригэр кыах бэриллэн, ырыынакка бэлэм оонньууну көрдөрүөхтээхтэр», – диэн тоһоҕолоон бэлиэтээтэ Руслан Тыкушин.

Устудьуоннар бырайыактара VK Play Арассыыйа сервиһигэр тахсыаҕа. Оонньуулара киэҥ сэҥээриини ыллаҕына, Steam норуоттар икки ардыларынааҕы платформаҕа тахсыаҕа.

Бырагыраама институт выпускниктарыгар саҥа саҕахтары арыйыаҕа: үрдүк үөрэҕи бүтэрбит туһунан диплому уонна идэҕэ бэлэмнэниини ааспыт туһунан докумуону сэргэ, кинилэр портфолиоларыгар дьиҥнээх кэмиэрчэскэй бырайыактаах тахсыахтара. Маны таһынан, ситиһиилээх хамаандалар «Дьокуускай» ИТ-паарка резиденнэрэ буолуохтарын сөп, инникитин туспа ИТ-хампаанньаҕа тиийэ үүнэр-сайдар кыахтаахтар.

Хаартыскалар:
Институт пресс-сулууспата