Устудьуон доҕорум, бэлиэ күҥҥүнэн!

Тохсунньу 25 күнэ – Арассыыйа устудьуоннарын бырааһынньыга.
Бу күн 1755 с. Елизавета императрица Москватааҕы судаарыстыбаннай университеты олохтуур туһунан ыйааҕы баттыыр. Оччолорго ити Сибэтиэй Татьяна күнүн кытта сөп түбэһэр. Онтон, 1850 сылтан, Николай I  император саҕаттан,  бүттүүн Арассыыйа үрдүнэн Устудьуон күнүн быһыытынан бэлиэтэнэр буолбута, арай сэбиэскэй кэм саҕана маассабайдык бырааһынньыктааһын аҕырымныы сылдьыбыта. 
21-с үйэҕэ, 2005 с. тохсунньу 25 күнүгэр, Арассыыйа Бэрэсидьиэнин “О Дне российского студенчества” ыйааҕа тахсан, билигин бу күнү бары  үөрэх кыһалара киэҥ далааһыннаахтык көрсөллөр. Устудьуоннары эҕэрдэлииллэрин сэргэ бу күн Татьяна диэн ааттаахтары эмиэ уруйдуур үгэс баар.
Бу кэрэ-бэлиэ күнүнэн Дьокуускай куораттааҕы үөрэх кыһаларын устудьуоннарын кытта кэпсэттибит, бэлиэ күнүнэн эҕэрдэлэрин иһиттибит. 

АГАТУ ВЕТ-24 бөлөҕүн 1-кы кууруһун устудьуоннара:

– Күндү преподавателлэрбитин кэлэн иһэр Татьяна күнүнэн эҕэрдэлиибит уонна биһигини үөрэтэргэ тулуургут, муудараскыт, кыһамньыгыт иһин махтанабыт! Эһиги билии саҥа саҕахтарын арыйарбытыгар, сатабылбытын сайыннарарбытыгар дьиҥ уһуйааччыларбыт, көҕүлээччилэрбит буолаҕыт.

Эһиги олоххутугар үөрүүлээх түгэн, ситиһии үксээтин, доруобай буолуҥ. Айар үлэҕэ кыайыылары, саҥа ситиһиилэри уонна махталлаах үөрэнээччилэри баҕарабыт!

АГИКИ, станковай живопись 2-с кууруһун устудьуоннара:

— Күндү устудьуон доҕоттор, эһигини билиигэ, инники олоххо, ыра санааҕа талаһааччылары бука барыларын ситимниир бырааһынньыгынан эҕэрдэлиибит! Устудьуон сыллара - хорсун быһаарыныы, доҕордоһуу уонна саҥаны арыйыы кэмэ.  Хайа да ыараханы туоруур модун санааланыҥ, ситиһиилэртэн кынаттанан, саҥаттан саҥаны ылсартан толлумаҥ. Үөрэнэ сылдьар кэмҥит хас биирдии түгэнин сыаналааҥ, бу - үйэ-саас тухары өйдөбүлгэ хаалар чаҕылхай кэм. Олоххо суолгут чаҕылхай буоллун, ыра санааларгыт туоллуннар!

Айтаана Тарабукина, “Айар уустар” креативнай индустриялар колледжтарын 2-с кууруһун устудьуона:

– Мин колледжка “конструктор-модельер изделий из меха”, ол эбэтэр түүлээҕинэн тигэр маастар идэтигэр үөрэнэбин. Үлэҕэ, үөрэххэ көхтөөхпүн, «Табыс» Таатта улууһун ыччат түмсүүтүн салайабын. Иллэҥ кэммэр кылынан, оҕуруонан уонна ииһинэн дьарыктанабын. Бу буолаары турар Устудьуон күнүгэр биһиги колледжпыт ыытар тэрээһинигэр дэгэрэҥ үҥкүүтүн үҥкүүлүөхтээхпин. Бу бэлиэ күнү уопсайбар дьүөгэлэрбин кытта атаарар былааннаахпын. Устудьуон күнүнэн бииргэ үөрэнэр доҕотторбун, преподавателлэрбин эҕэрдэлиибин. Бары үчүгэйи баҕарабын.

Мичийэ Солдатова, “Айар уустар” креативнай индустриялар колледжтарын 3-с кууруһун устудьуона:

– Мин “Айар Уустар” колледжка “конструктор-технолог швейных изделий” идэҕэ үөрэнэбин. Бу үөрэх туһунан дьүөгэлэрбиттэн истэн туттарсыбытым. Иллэҥ кэммин доҕотторбун кытта атаарабын, чугас дьоммор күүс-көмө буолабын. Устудьуон күнүгэр дойдубар баран күүс-сэниэ ылынар былааннаахпын. Бииргэ үөрэнэр оҕолорбун кэлэн иһэр Устудьуон бырааһынньыгынан эҕэрдэлиибин! Үөрэхтэригэр, олохторугар ситиһиилэри баҕарабын.

Дьокуускайдааҕы тыа хаһаайыстыбатын техникумун ВЕТ-22 бөлөҕүн 3-с кууруһун устудьуоннара:

­– Техникум бары устудьуоннарын Сибэтиэй Татьяна күнүнэн – эдэр саас, дьулуһуу уонна инникигэ эрэл бырааһынньыгынан эҕэрдэлиибит! Бу күн биһиэхэ ситиһии, саҥаны арыйыы боруогар үктэнэн турарбытын кэрэһилиир. Устудьуонуур сыллар – хатарыллар, күүстээх санааланар, соругу ситэргэ чугаһатар кэм. Устудьуон доҕотторбутугар үгүс кыайыылары, иэйиилэри уонна умнуллубат чаҕылхай түгэннэри баҕарабыт. Лиэксийэлэргит сэргэхтик, быраактыкаларгыт туһалаахтык, сиэссийэлэргит стреһэ суох аастыннар. Доҕор-атас, преподавателлэргит уонна чугас дьоҥҥут өрүү көмөлөһөргө бэлэмнэрин, өйөбүллэрин умнумаҥ. Хас биирдиигитигэр бэйэ күүһүгэр эрэллээх буолууну, үрдүк ситиһиилэри баҕарабыт. Үөрэххит кыһатын эрэллээх эркинэ үөрүүнү эрэ тосхойдун. Инникитин хас биирдиибит талан ылбыт идэтигэр бигэ суолу хааллардын, төрүт факультетын киэн туттуута буоллун!

АГАТУ, ВЕТ-22 1-кы, 2-с бөлөх устудьуоннара:

– Күндү доҕотторбутун Устудьуон күнүнэн эҕэрдэлиибит. Бу бырааһынньык – биһиги күммүт, ол эбэтэр аҥаардас үөрэнэ сылдьарбытынан эрэ буолбакка, үгүс ыараханы туораан, күүстээх санааланарбытынан, дьулуһар ырабытыгар чугаһаан эрэрбитинэн киэн туттар күммүт. Хас биирдии устудьуон утуйар уу умнуллубут түүннэрин, эксээмэннэргэ бэлэмнэнии стреһин ааһар бэйэтэ туһунан суоллаах. Ол эрээри бу барыта дириҥ билиини биэрэр суолталаах, доҕоттору кытта атаарар чаҕылхай түгэннэр аргыстаах, хаһан эрэ дьиҥнээх идэтийии таһымын баһылаабыт буоларга эрэли саҕар кэмнэрдээх. Бу бэлиэ күн биһиги курдук билии суолун тэлээччи, инники туруоруммут сорукка дьулуһааччы элбэҕин, соҕотох буолбатахпытын санаттын. Бары устудьуоннарга тулууру, кыаҕы уонна дьулуурдаах буолууну баҕарабыт. Устудьуон кэмэ үөрэх эрэ буолбакка, доҕордоһуу, истиҥ мичээр уонна хорсун былааннар кэмнэрэ буоларын умнумуох.

Дьокуускайдааҕы технология уонна управление колледжын ТТО-24 1-кы кууруһун устудьуоннара:

– Устудьуон күнүнэн эҕэрдэлиибит! Бэйэ кыаҕар эрэнэн, үрдүктэн үрдүк чыпчааллары дабайан иһиҥ. Хас биирдиибит билигин билии, доҕордоһуу аргыстаах бэлиэ, чаҕылхай түгэннэрдээх суолга үктэнэн турабыт. Үөрэҕи чэпчэкитик ылынан, сессиялары этэҥҥэ туораан, сарсыҥҥы күнү сырдык иэйиилээх көрсүҥ. Олоххутугар үгүс кыайыы баар буоллун, долгуйар түгэҥҥит аҕыйаатын. Чугас доҕотторго уонна олох интэриэһинэй түгэннэригэр аныыр иллэҥ кэмҥит өрүү баар буоллун. Устудьуоннуур сылларгыт кэлэр ситиһиилээх кэмнэргэ олук буоллуннар, умнуллубат чаҕылхай түгэннэрэ өйдөбүл буолан хааллыннар.