Устудьуон билиэтэ уонна “зачетка” электроннай көрүҥҥэ көһөллөр

РФ Үөрэххэ уонна билимҥэ  министиэристибэтэ: “Арассыыйа университеттара электроннай көрүҥ устудьуон билиэтигэр уонна зачет киниискэҕэ  көһөллөр. Үрдүк үөрэх устудьуоннара, аспираннара уо.д.а.  дьиҥ чахчы үрдүк үөрэх кыһатыгар үөрэнэллэрин бигэргэтэллэригэр бэйэлэрин электроннай көрүҥ киниискэлэрин, зачеттарын киниискэтин үс араас суол ньыманы туһанан киирэн билсэр кыахтаахтар: үөрэнэр университеттарын интэриниэт-ресурсатыгар киирэн, Судаарыстыбаннай өҥө кэлим порталын туһанан (ЕПГУ) уонна МАХ мессенджери туһанан”, – диэн, лаппыйан бэлиэтиир эбит.

Оттон билиҥҥитэ дойдубут 4,5 мөл. устудьуона бу этиллэр докумуоннарын туһунан сибидиэнньэни ЕПГУ уонна МАХ нөҥүө бигэргэтэр кыахтааҕа, ол тэрээһининэн уонна ону хааччыйыынан Рособрнадзор анал тиһигэ дьарыктанара этиллэр.

Наада түгэнигэр устудьуоннар билигин да  сайабылыанньа суруйан, ити докумуоннарын кумааҕы көрүҥүнэн ылар кыахтаахтар. Онуоха урукку курдук биир тэҥ, кэлим федеральнай стандарт диэн баара тохтообут.  Онон форматын үрдүк үөрэх кыһалара бэйэлэрэ быһаарар буолбуттар.

Устудьуон электроннай билиэтин көрөр, бэрэбиэркэлиир кыах судургу (универсальнай). Үөрэх уонна билим кыһалара бары уонна устудьуоннарга чэпчэтиилэри уонна льготалары көрөр кэмиэрчэскэй, тырааныспар, култуура уонна да атын хаһаайыннааһын уонна быраап ханнык баҕарар көрүҥэр үлэлэһэр тэрилтэлэр бары киирэн көрөр кыахтаахтар.

“Докумуону сыыппараҕа көһөрүү – үөрэх кыһаларын икки ардыгар докумуон эргиирин тэтимирдэр. Араас көрүҥ чэпчэтиини туһанар сыалга үрдүк үөрэх кыһатыгар үөрэнэри бигэргэтии биллэ судургутуйар” , – диэн быһаарбыттар.

Докумуону алҕас сүтэрэн биитэр умнан кэбиһэн, ол мучумааныгар түһэр куттал  да тохтоотоҕо. Арай уот, сибээс барар, сүтэр түгэнигэр кумааҕым ордук эрэллээх буолуох курдуга дуу? Таах да Үлэ киниискэтигэр электроннай көрүҥ киирбитэ омсолоох өрүтэ көстө илик бадахтаах. Дьон: “Табыгастаах”, – диир эбит.