Урукку кэм дьоруойдара. Володя Губин

Бу быһылаан билиҥҥинэн Губин аатынан уулуссаҕа буолбута. Ол саҕана Саллаат күөлэ улахан да улахан эбит. Володя Губин кэргэниниин үлэлэриттэн бүтэн дьиэлээн испиттэр. Кинилэр күөлтэн чугас мас этээстээх дьиэҕэ олорбуттара.

Күһүҥҥү чараас мууска оонньуу сылдьыбыт оҕолор ууга түспүттэрин көрөн, Володя, уһуну-киэҥи толкуйдаабакка, оҕолору быыһыы ыстанар. Кини харбааһыҥҥа бастакы разрядтаах буолан, тыына уһун, эт-хаан өттүнэр бэйэтин кыанар киһи. Түөрт оҕону ууттан быыһыыр уонна бэйэтэ кыайан быыһаммакка хаалар. Оҕо күүтэр кэргэнин хараҕар эдэркээн уол ууга былдьанар.

Быыһаммыт оҕолор Галя Колесникова балтыларыныын уонна Игорь Королев диэн этилэр.

Губин Владимир Сергеевич (1939-1964) – 1939 сыллаахха Мурманскайга төрөөбүт. 1956 с. хараабыл тутар судоверфькэ үлэтин саҕалаабыт. 1958 с. Ленинградтааҕы уу көлөтүн институтугар үөрэнэ киирбит, экэнэмиис идэтин баһылаабыт, үөрэнэ сылдьан Дьокуускайга практикатын барбыт. 1963 сыллаахха институту туйгуннук бүтэрэн баран Өрүс флотун министиэристибэтинэн Өлүөнэ бассейнын управлениетын Дьокуускайдааҕы учаастагар старшай экэнэмииһинэн анаммыт. Онтон былаанныыр-экэниэмикэ отделыгар начаалынньыгынан үлэлиир. Кэргэннээҕэ, суорума суолланарыгар ойоҕо хат сылдьан огдообо хаалбыта.

Владимир Губин өлбүтүн кэннэ "Бочуот Бэлиэтэ" уордьанынан уонна Саха АССР Үрдүкү Сэбиэтин бөрөсүүдьүмүн Бочуоттаах грамотатынан наҕараадаламмыта, ЫБСЛКС Саха сиринээҕи обкуомун Ытык кинигэтигэр киллэриллибитэ.

1964 сыллаахха алтынньы 30 күнүгэр Дьокуускай горсоветын быһаарыытынан Озернай уулусса кини аатын сүгэр буолбута.

Сыллата кини хорсун быһыыны оҥорбут күнүгэр Дьокуускай куорат Губинскай уокуругун управата уонна Уу тырааныспарын институтун курсааннара пааматынньыгар сибэкки дьөрбөтүн аҕалан уураллар. Уокурукка Володя Губин аатын үйэтитэр декада ыытыллар. Кини аатынан уулусса 33-с №-дээх дьиэтин аттыгар Володя Губин бүүһэ туруоруллубута.

Пааматынньык олохтоох көҕүлээһиннэри өйүүр федеральнай бырагырааманан үбүлэммитэ. Губинскай уокурук олохтоохторо 65 тыһ. солк. хомуйбуттара, өрөспүүбүлүкэ бүддьүөтэ субсидия быһыытанан 1 мөл. 954 тыһ. солк. анаабыта. Пааматынньык уопсай сыаната 2 мөл. 169 тыһ. солк. буолбута. Спонсор быһыытынан Куорат дууматын дьокутаата Владислав Дмитриев кыттыспыта.

Интэриэһинэй чахчы: Володя Губин пааматыньыгын макетын бастаан пластилинынан Классическай гимназия үөрэнээччитэ Соня Огонерова, эһэтэ скульптор Егор Огонеров көмөтүнэн, оҥорбута. Кыысчаан “Инникигэ хардыы” конференцияҕа “Володя Губин – биһиги кэммит дьоруойа” бырайыагынан иккис миэстэ буолбута.