Урбаанньыттар «арыгы сокуонугар» уларыйыылары билсибиттэрэ

Б.дь. кулун тутар 1 күнүттэн «Саха Өрөспүүбүлүкэтигэр арыгы бородууксуйатын бытархай атыытын бириэмэтигэр, усулуобуйатыгар уонна миэстэтигэр эбии хааччахтааһыны олохтуур туһунан» сокуон үлэлээн саҕалаата.
Сокуон күүһүгэр киириэн иннинэ, олунньу 28 күнүгэр, куорат баһылыгын солбуйааччы Владимир Дорожкин ВКС ньыматынан куорат урбаанньыттарын кытта көрсөн, киирбит уларыйыылары быһаарбыта.
Владимир Дорожкин урбаанньыттарга ааспыт сылтан куорат баһылыга Евгений Григорьев 2023 сыл балаҕан ыйын 1 күнүттэн үлэлиир «Саха Өрөспүүбүлүкэтигэр арыгы бородууксуйатын бытархай атыытын бириэмэтигэр, усулуобуйатыгар уонна миэстэтигэр эбии хааччахтааһыны олохтуур туһунан» сокуоҥҥа уларытыылары киллэриини көҕүлээн, 2024 сыл сэтинньи 27 күнүгэр Ил Түмэн дьокутааттарынан уларытыылар ылыныллыбыттарын бэлиэтээтэ.
Ол курдук, элбэх кыбартыыралаах олорор дьиэлэргэ уонна кинилэртэн 50 миэтэрэ чугас сиргэ арыгылаах утах уонна пиибэ кулун тутар 1 күнүттэн күнүс 14.00 ч. киэһэ 20.00 ч. диэри атыыланар. Ол эрээри элбэх кыбартыыралаах дьиэҕэ үлэлиир кафе күнүс 12.00 ч. киэһэ 23.00 ч. диэри үлэлиирэ көҥүллэнэр, өскөтүн лицензиялаах уонна ГОСТ ирдэбилигэр эппиэттиир усулуобуйалаах түгэнигэр. МКД таһыгар баар кафе, бар, буфет курдук тэрилтэлэр эмиэ маннык үлэлииллэр. Сокуон эрэстэрээннэргэ сыһыана суох. 
Олохтоох дьаһалта Урбааҥҥа, потребительскай ырыынакка уонна туризмы сайыннарыыга департаменын чахчытынан, бүгүҥҥү күҥҥэ Дьокуускай куорат территориятыгар арыгылаах бородууксуйанан эргинэр 228 уопсастыбаннай аһылык тэрилтэтэ баарыттан элбэх кыбартыыралаах олорор дьиэҕэ түһүүлэнэн олорооччута 17, ол иһигэр 11 тэрилтэ анал лицензиялаах. 113 эбийиэк элбэх кыбартыыралаах олорор дьиэ территориятыгар туратыттан лицензиялааҕа 68. Бүгүҥҥү күҥҥэ 26 эбийиэк кулун тутар 1 күнүттэн күнүс 14.00 чаастан киэһэ 20.00 чааска диэри хааччахтааһынынан хабыллыбыт буолуохтаах, диэн Олохтоох дьаһалта пресс-сулууспата иһитиннэрэр.