Урбаанньыт Алексей Устенков: “Бастатан туран анал байыаннай дьайыы инбэлииттэрин үөрэтэ сатыахпыт”

Гранынан өйөбүл ылбыт бырайыак иитинэн доруобуйаларынан хааччахтаах дьону, ону тэҥэ доруобуйаларынан хааччахтаах АБДь кыттыылаахтарын, бэтэрээннэрин оҕолорун массыына ыытарга быраап ылар кууруска босхо үөрэтиэхтэрэ.

Дириэктэр Иннокентий Устенков кэпсээбитинэн, кинилэр бастатан туран анал байыаннай дьайыыттан ыарахан бааһырыылары ылан кэлбит, инбэлииккэ тахсыбыт дьоҥҥо көмөлөһөр соруктаахтар. Ол курдук, илиитэ, атаҕа суох буолбут доруобуйаларынан хааччахтаах дьоҥҥо аналлаах массыыналардаахтар эбит.

Курсааннар биир ый теорияны үөрэтэллэр уонна иккис ыйтан массыынаны ыытарга эрчиллэллэр. Уопсайа 2-3 ый үөрэниэхтэрин сөп. Бырагыраама барыта доруобуйаларынан хааччахтаах дьоҥҥо ананан оҥоһуллубут. Холобур, истибэт дьону кытта үлэлиир сурдо-тылбаасчыттаахтар, уруулга олорортон саллар, бастаан утаа куттанар дьону кытта биирдиилээн үлэлэһэр психологтаахтар.

“Дьиҥэ бизнес социальнай хайысхалаах буолуохтаах диэн санаа миэхэ уруккуттан баара. Ол иһин урут даҕаны биирдиилээн доруобуйаларынан хааччахтаах дьону, арааһы тобулан, сороҕор буор босхо, сороҕор сыана аҥаарыгар, аҥаарын бэйэбит уйунан, спонсордары булан эҥин, суоппар быраабын ыларга үөрэтэр этибит.

Онтон былырыын “Синет спарк” аһымал пуонда өйөбүлүнэн 10 инбэлиит босхо үөрэммитэ. Мантан ыла бырайыакпыт дьэ күүһүн ылбыта диэххэ сөп.

Билигин бу кыайбыт граммыт көмөтүнэн доруобуйаларын хааччахтаах 20 дьону босхо үөрэтэр кыахтанныбыт. Кэлэктииппитигэр 15 үлэһиттээхпит, олортон 10-на  инструктор. Сиһилии бырайыак туһунан Орджоникидзе, 10, 504 хоһугар, сайаапка биэрээччилэр эрдэттэн 89142738873 нүөмэргэ эрийэн билсэн кэлиэхтэрин наада.

Биһиги бука бары, ол иһигэр урбаанньыттар, дойду билиҥҥи балаһыанньатын учуоттаан, АДБь буойуннарыгар өйөбүл, тирэх буоллахпытына сатанар”, - диэтэ Иннокентий Алексеевич.