Дириҥ суолталаах бэлэх

 Ол тэрээһиҥҥэ быйыл куораппыт баһылыга Евгений Николаевич Григорьевка бэрт ураты бэлэҕи оҥорбуттарын бэлиэтии көрөн, тугун, ханныгын туоһаластыбыт.

Биһиги ыйытыыларбытыгар Тулагы-Киллэм нэһилиэгин аҕа баһылыга Егор Гаврильевич Попов хоруйдаата:
- Туймаада ыһыаҕын иккис күнүгэр  куорат дьаһалтатын бары салааларын, кытыы нэһилиэктэр уонна уокуруктар салайааччылара, спонсордар, партнердар уонна да атын бас-көс дьон мустан ирэ-хоро кэпсэтэр, сүбэлэһэр, улахан үлэ тосхолугар сыана быһар, санаа атастаһар үгэстэрэ баар. Баһылыкпытыгар былырыын онно тирииттэн оноhуллубут кэһэх оһуорун “Үс саханы үөскэт, түөрт саханы төрөт” диэн дириҥ ис хоһоонноон туттарбыппыт. Дьокуускай куорат Аҕаларын сүбэтин биир көхтөөх аҕата Николай Баишев-Куока баай Нэммэрэ оҥоhуга этэ.
Оттон быйыл тугу өйдөбүнньүк оҥорон бэлэхтиибит диэн толкуйдаан көрөн баран, уруккуттан алтыһар ууспар, Уус Алдантан төрүттээх тимир ууһа, норуот маастара Роман Готовцевка үлэһэргэ санаммыппыт.

Ыһыах бастакы күнүгэр Евгений Николаевич Уус Алдан Түүлээҕин Тимирдээх үрэҕиттэн хостоммут рудаттан болгуо тимири уһаарыыга кыттыбыта. Тимир руда буолла да барытыттан болгуо тимир тахсар диэн буолбатах. Болгуо эмиэ айылҕалаах, күүстээх энергетикалаах эрэ дьоҥҥо табыллар. Евгений Григорьев онно бэйэтэ эллээн таһаарбыт тимирин өйдүү-саныы сылдьар гына бэйэтигэр бэлэхтиэххэ диэн идея киирбитэ.

Ууспут болгуо тимири аҥаардаан удьурҕайга ууран, сатабыллаахтык ыпсаран, киһи эрэ кэрэхсиэх курдук тупсаҕайдык оҥорон биэрбитэ.
Түүр омуктарга тимир кыахтаах, күүстээх, инникилээх, айар-тутар дьулуурдаах буолууну туоһулуур. Оттон сахаларга тимир ууһа ойууннааҕар үрдүк таһымҥа турарын билэбит.

Егор Попов:

- Быйыл Үс Хатыҥҥа Уус Алдан тимир уустара Роман Ильич Готовцев сүрүннээһининэн тимири уһаардылар диэн тоһоҕолоон этиэм этэ.

Инньэ гынан Дьокуускай 8 уокуругун уонна 7 кытыы сытар нэhилиэгин баһылыктара түмсэн, куораппыт баhылыгар махталбытын итинник бэлэҕинэн биллэрдибит. 
Бэйэм муниципальнай сулууспаҕа үлэлээбитим син ыраатта, дьаһалта ис үлэтигэр да сылдьыбытым, онон бу Туймаада ыһыаҕын тэрээһинин иһиттэн билбитим-көрбүтүм элбэх. Үгүс-үтүмэн үлэттэн тахсар сүдү тэрээһиммит - Туймаада ыһыаҕа өссө да инники көлүөнэлэргэ ыытылла туруоҕа диэн эрэллээхпин. Быйыл Норуоттар сомоҕолоhууларын уонна Култуура сылларыгар анаммыт ыһыахпыт үрдүк таhымнаахтык, элбэх ыалдьыттаах этэҥҥэ ааста. Тэрийбит дьоҥҥо, спонсордарга эҕэрдэбин тиэрдэбин! Сахабыт сирин дьоно-сэргэтэ самаан сайыҥҥа күүс-уох ылынан, оттоон-мастаан, аны кыhыҥҥа үчүгэй  бэлэмнээх көрсүөҕүҥ!