«Урамньы», «ырал», «дьүөрэл бэйэлик»

Төрөөбүт тыл, сурук-бичик күнүн көрсө «Саха култууратын тиэрминнэрин нууччалыы-сахалыы, сахалыы-нууччалыы тылдьыта» сүрэхтэннэ.

Саҥа кинигэ «Саха Өрөспүүбүлүкэтин судаарыстыбаннай уонна дьиҥ таһымнаах тылларын харыстыыр уонна сайыннарар» судаарыстыбаннай тускул иитинэн бэчээттэнэн таҕыста. Икки чаастан турар кинигэ Новосибирскай куоракка «Наука» кинигэ кыһатыгар 600 ахсаанынан күн сирин көрдө.

Тыл эйгэтигэр дьоһун суолталаах тылдьыты Хотугулуу-Илиҥҥи норуоттар тылларын уонна култуураларын институтун культурологияҕа уонна саха тылын стилистикэтигэр уонна тылбааһыгар кафедралара бэлэмнээн таһаардылар. Научнай эрэдээктэринэн филология билимин хандьыдаата, ХИФУ ХИНТуоКи дириэктэрэ Гаврил Торотоев, тылдьыкка институт уһуйааччылара уонна профессордара Людмила Ефимова, Саргылана Никифорова, Галина Попова, Саргылана Иванова, Лидия Манчурина уо.д.а. үлэлээтилэр.

Саҥа сүрэхтэммит тылдьыт тылы үөрэтэр устудьуоннарга, култуура уонна да атын эйгэ үлэһиттэригэр, суруналыыстарга ананар.

«Киин куорат» саҥа тылдьыкка киирбит тиэрминнэри холобурдуур:

волонтерство – үтүө көмөнү оҥоруу

музей – түмэл

искусство – урамньы

программа – тускул

идеал – ырал

духовный потенциал – айылгы кыаҕа

аудиовизуальное произведение – истэр-көрөр айымньы

гармоничная личность – дьүөрэл бэйэлик

гражданская позиция – дойдулаах тутуһар санаата

гуманизм – киһитийии

Хаартыска: Афанасий Ноев ТГ-ханаалыттан