Уоту араарыы түмүгэр бытовой тиэхиньикэ умайда: Тугу гынабыт?

Екатерина, куорат олохтооҕо:

– Салайар хампаанньабыт бэҕэһээ сарсыарда 9 чаастан 11 чааска диэри электричество уотун араараллар диэн сэрэппитэ. Бу сарсыарда, биллэрбиттэрин курдук, эппит бириэмэлэригэр араардылар уонна холбоотулар. Онно холодильнигым умайан хаалла. Бу сайын кэлээри турдаҕына холодильнига суох хайдах олоруомуй?! Суһаллык маастар булан, кэлэн тиэхиньикэбин көрөрүгэр көрдөстүм. Маастарым эмискэ уот холбоммутугар платота умайбыт диэн быһаарда уонна өрөмүөммэр 13 тыһ. солк. тутан барда. Озоҥҥа бу саппаас чаас 2-3 тыһыынчаҕа турар эбит. Кыһалҕалаах киһи хайыаххыный, төлөөтүм. Маастар этэринэн, уоту араарыы-холбооһун түмүгэр куорат үрдүнэн маннык ис хоһоонноох элбэх сайаапка киирэр эбит.

«Статус» юридическай хампааннньа юриһа Александр Герасимов:

Маннык түгэҥҥэ тугу гынабыт:

1. Салайар хампаанньаҕа сайаапка түһэрэҕит, быһылаан буолбут күнүн-дьылын ыйан туран.

2. Салайар хампаанньа үлэһиттэрэ кэллэхтэринэ, акт толороҕут. Манна дьиэ аадырыһын, уот арахсыбыт, холбоммут бириэмэтин, умайбыт тиэхиньикэ испииһэгин киллэрэҕит.

3. Салайар хампаанньа акт толорортон аккаастанар эбэтэр кэлэрэ кыаллыбат буоллаҕына, 2-3 ыал бэрэстэбиитэлин ыҥыран, бэйэҕит толороҕут.

4. Алдьаммыт тиэхиньикэни өрөмүөҥҥэ илдьэҕит эбэтэр маастары ыҥыран, алдьаныы биричиинэтин уонна өрөмүөн сыанатын туһунан сурук ылаҕыт.

Өрөмүөннэнэр кыаҕа суох буоллаҕына, тиэхиньикэҕитин атыыласпыт чеккитин булаҕыт эбэтэр ырыынакка сыанатын оҥортороҕут.

5. Бу кумааҕылары электроэнергиянан хааччыйар тэрилтэҕэ тиксэрэн, хоромньуну толуйарыгар көрдөһөҕүт.

6. Тэрилтэ аккаастанар эбэтэр болҕомтоҕо ылбат түгэнигэр, суукка үҥсэҕит.

Маннык хардыылары оҥорон, хоромньугутун толуйтарар бырааптааххыт.