Уоттан сэрэхтээх буолуу быраабылатын тутуһуҥ

Саҥа дьыл бырааһынньыгын кэмигэр медицина тэрилтэлэригэр салюттан, петардаттан уо.д.а. пиротехникаттан эмсэҕэлээбит дьон кэлиитэ үксүүр.

Саҥа дьыллааҕы бырааһынньыгы үөрүүлээхтик, доруобайдык көрсөр туһугар уоту сэрэхтээхтик туттуу быраабылатын тутуһары СӨ 2-с №-дээх балыыһатын Суһал медицинскэй көмөнү оҥорууга киинин иһинэн үлэлиир ожоговай киин комбустиолог-быраастара санаталлар.

«Бары пиротехника оҥоһуктарын сүрүн састааба умайар эттиктэр булкадаһыктарыттан  турар. Онон фейерверктэр туттарга улахан болҕомтону эрэйэллэр. Биһиги, быраастар, пиротехника оҥоһуктарыттан туттунаргытыгар эбэтэр маннык бородууксуйаны анал маҕаһыыннартан эрэ атыылаһаргытыгар сүбэлиибит ­– бу пиротехника хаачыстыбалааҕын уонна, сүрүнэ, куттала суох буоларын мэктиэлиэ, – диэн ожоговай киин салайааччыта Светлана Семёнова сүбэлиир. – Саҥа дьыл бырааһынньыгын кэмигэр фейерверктэртэн, петардалартан уонна бенгальскай уоттартан саамай тарҕаммыт эчэйиинэн сирэйи уонна илиини уокка сиэтии, ону тэҥэ хараҕы өлөрүү буолар. Күүстээх пиротехника оҥоһуктара чугас эһиннэхтэринэ, киһи иҥииригэр, ньиэрбэтигэр тиийэ эчэтиэхтэрин сөп. Өскөтүн бэйэҕит эбэтэр чугас дьоҥҥут маннык эчэйдэхтэринэ, суһаллык бырааска тиийэргит эбэтэр медицина көмөтүн ыҥыраргыт булгуччулаах. Өйдөөҥ, уокка сиэтии төһө дириҥин быраас эрэ быһаарар уонна сөптөөх эмтэниини аныыр кыахтаах».

«Мир без ожогов» Бүтүн Арассыыйатааҕы комбустиологтар уопсастыбаннай холбоһуктара уоттан эчэйии түгэнигэр хайдах дьаһанары сүбэлиир:

— Уокка сиэппит сири сөрүүн ыраас уунан 10-15 мүнүүтэ устата сойутуҥ. Бу уокка сиэтии улаатыытын тохтотуо, ыарыыны уонна иһиини кыччатыа. Мууһунан сойутар табыллыбат!

— Уот сиэбит сирэ хабыллан таҕыстаҕына, хабахтары тэһимэҥ! Инфекцияны киллэриэххэ сөп.

— Арыынан да, мааһынан да сотуллубат, пенанан ыстарыллыбат.

— Сиэтиллибит сири стерильнэй салфетканан саба ууруҥ.

— Эчэйээччигэ ыарыыны мүлүрүтэр эми сааһынан таба көрөн кээмэйдээн иһэрдиҥ. 

— Уокка сиэтии улахан буоллаҕына, өскөтүн эчэйээччи хотуолаабат түгэнигэр, элбэхтик уута иһэрдиҥ.

— Итии киһи тыынар куолаҕайын таарыйбыт буоллаҕына, эчэйбити үөһээ өттүн өрө көтөҕөн сытыарыҥ.

— Хараҕы сиэттэххэ, сэрэнэн ыраас уунан сууйан, стерильнэй биинтэнэн бэрэбээскилээн баран суһаллык исписэлиискэ көрдөрүллэр.

СӨ 2-с №-дээх балыыһатын Суһал медицинскэй көмөнү оҥорууга киинин пресс-сулууспата