Уоттан сэрэхтээх буолары болҕойуох
Күүтүүлээх Саҥа дьылы көрсө дьон-сэргэ дьиэтин-уотун киэргэтэн саҕалаата, ыал аайы симэммит харыйа лаглайа киэркэйдэ. Хараҕы үөрдэр чаҕыл гирлянда, уоттаах-күөстээх оонньуурдар, тыастаах-уустаах салюттар – бу барыта киһи эрэ кэрэхсиэх, бырааһынньык кутун иҥэриэх кэрэ көстүүлэр. Ол эрээри сыыһа туттууттан, сэрэҕэ суох буолууттан күлүмүрдүүр уоттарбыт алдьархайга тиэрдэр кутталлаахтарын умнуо суох кэриҥнээхпит. Бу кэмнэргэ дьон элбэхтик пиротехниканы, уоту-күөһү хото туттар буолан, уот туруутугар тоҕоос үөскүүр, куттал улаатар. Туох быраабыланы тутуһуллуохтааҕый?
Дьиэни сылытарга
– Чааһынай дьиэлээхтэр баччаларга халлаан тымныйан оһохторун күүскэ оттоллор, эбии ититэр тэриллэри холбоноллор. Өр кэмҥэ оттуллубакка турбут оһоҕу оттуох иннинэ хайаан даҕаны ураата бүтүнүн үчүгэйдик көрөр ордук.
– Эбии ититэр тэрили туһаныах иннинэ сөпкө үлэлиирин көрүҥ.
Пиротехниканы ытарга
– Саҥа дьылы көрсөргө салют, фейерверк ытааччылар пиротехника хайаан да сэртипикээттээх, анал маҕаһыынтан ылыллыбыт буоларын учуоттааҥ. Ону таһынан тас хоруопката бүтүнүн, сиигирбэтэҕин көрүллэр.
– Тас хахха салюту оҥорбут тэрилтэ аадырыһа, төлөпүөнүн нүөмэрэ сурулла сылдьыахтаах. Инструкциятын толору ааҕан тутуһуллуохтаах.
– Салют, фейерверк ытар сир чугаһыгар уот линията, мастар суох буолуохтаахтар. 30 м радиуска туох да суох буолара ирдэнэр. Күүстээх тыалга ыппат ордук.
– Уматыах иннинэ салюту коробкатын сиргэ тирэхтээх гына уурар ирдэнэр, илиигэ эҥин тута сылдьан уматыллыбат.
– Ытан бүттэҕинэ коробканы 5 мүнүүтэ иһигэр тыытыллыбат.
– Бу эстэр тэрил таһыгар табахтыыр бобуллар.
– Көрөр дьон 15 м тэйиччи туруохтаах.
Дьиэни гирлянданан симииргэ
– Гирлянданы, лаампалаах уокка холбонор киэргэллэри эмиэ сэртипикээттээхтэри эрэ ыларга дьулуһуҥ.
– Дьиэттэн тахсан бараргытыгар араара сылдьыҥ.
– Харыйа дьиэ эркинигэр уонна үрүтүгэр, итийэр тэриллэргэ сыстан туруо суохтаах.
– Гирлянданы хайаан да тарҕата тутуллуохтаах. Бэйэ бэйэтигэр ыксары чөмөхтөммүт лаампалар итийэн умайан тахсар кутталлаахтар.
– Таһырдьаны киэргэтэргэ анаммыт таска холбонор гирлянданы эрэ туһаныҥ.
Быһылаан тахсар түгэнигэр
– Уот күөдьүйэр түгэнигэр тута мобильнайтан 101 (стационартан 01) эбэтэр 112 нүөмэргэ эрийэн биллэриллиэхтээх, аадырыһы этиллиэхтээх.
– Киһиэхэ буруо ордук кутталлааҕын умнубат ордук. Пластик да, дьиҥнээх харыйа да уот сахта да түргэнник умайан тахсар кутталлаахтар. Онон бэйэ күүһүнэн улахан уоту умуллара сатаабакка, куттала суох сиргэ тэскилиир наада.
Балаһаны Марфа Иванова бэлэмнээтэ
Сонуннар
Ордук ааҕаллар
