Уоттаах-күөстээх Дьокуускай...

Эриэккэс элбэх өҥнөөх уоттардаах, чаҕылыҥнас лаампалардаах оҕо аймахтан саҕалаан кырдьаҕаһыгар тиийэ кэтэһэр, күүтэр быраааһынньыкпыт, саргылаах Саҥа дьылбыт кэлэрэ аҕыйах хонук хаалла.

Куораппыт Олохтоох дьаһалтата сылын аайы “Саҥа дьыллааҕы Дьокуускай” диэн бастыҥ бырааһынньыктааҕы киэргэтиигэ аһаҕас куонкуруһу үгэскэ кубулутан ыытар. Кыайыылаахтар харчынан, махтал суруктарынан бириэмийэлэнэллэр.

Быйыл да куораппыт киэркэйбитэ сүрдээх, аҥаардас болуоссаттарбыт уларыйбыттара, саҥалыы өҥүнэн сандаарбыттара, араас оонньуурдарынан симэммиттэрэ, кырдьык да, киһи эрэ сүрэҕин манньытар кэрэ көстүү буолан бырааһынньыктааҕы сүргэбит көтөҕүллэр.

Бүгүн, куораппыт эрэ олохтоохторугар буолбакка, ыраах-чугас олорор эрэллээх ааҕааччыларбытыгар Сахабыт сирин дьоллоох Туймаадатын туонатыттан, хараххытын манньыта, санааҕытын көтөҕө, дьэрэкээн хаартыскалары таһаарабыт. Хаартыскалары барытын ааптар куораты кэрийэ сылдьан түһэрдэ, ону тэҥэ А.А. Кырдьаҕааһап салайар “Водоканал” тэрилтэ оҥоһуктарын Софья Софроновна Прокопьева бэрт дөбөҥнүк көрдөһүүбүтүн быһа гыммакка ыыппытыгар махтанабыт.