Уот иккис диапазонун туһанааччыларга дьоһуннаах сонун

Ил Түмэн дьокутааттара бэс ыйын 18 күнүгэр буолбут 19-с уочараттаах пленарнай мунньахтарыгар уотунан сылытыыга көрүллэр чэпчэтиилээх тарыыбы кэҥэтэр сокуону бүтэһиктээх ааҕыыга ылыннылар. Докумуон «Саха Өрөспүүбүлүкэтигэр убаҕас гаас, уот, ититии энергиятыгар, уунан хааччыйыыга уонна ууну ыытыыга чэпчэтиилээх тарыыптар тустарынан» сокуоҥҥа эбии быһыытынан киирэр буолла.

Билиҥҥитэ уотунан сылытыыга чэпчэтиилээх тарыып бастакы диапазону туһанааччыларга эрэ дьайар. Оттон бу ылыллыбыт саҥа сокуоҥҥа олоҕуран, маннык чэпчэтиигэ гидроэлектростанция хааччыйар зонатыгар олорор, уотунан сылытыынан (электроотопление) туһанар иккис диапазону туһанааччылар эмиэ хапсар кыахтаннылар. Онуоха биири бэлиэтиир тоҕоостоох: чэпчэтии муҥутуур тымныылаах сэтинньи, ахсынньы, тохсунньу уонна олунньу ыйдарга эрэ дьайыаҕа.

Маннык уларытыыны киллэриигэ Бүлүү бөлөх улуустарга 2025–2026 сыллааҕы кыстыкка бэлиэтэммит быһыы-майгы төрүөт буолла. Ол эбэтэр уот иһин төлөбүрдэрэ тымныы ыйдарга өрө кыырайан тахсан, улахан аймалҕаны таһаарбытын өйдүүргүт эрэбил. Балаһыанньаны быһаарар сыалтан, 2026 сыл тохсунньутугар биэдэмистибэлэр икки ардыларынааҕы анал үлэлиир бөлөх тэриллибитэ. Бу бөлөх 2025 сылга Сунтаар, Ньурба улуустарыгар электро-ититии өҥөтүн ааҕыы, төлөһүү бэрээдэгин үөрэтэн, ырытан көрбүтэ. Ол түмүгүн Ил Түмэн туһааннаах кэмитиэтигэр кулун тутар 20 күнүгэр дьүүллэспиттэрэ.

Ырытыы көрдөрбүтүнэн, 12 501 сирэй счеттан бастакы диапазоҥҥа – 11 122 счет (89%), иккискэ – 890 (7,1%), үһүскэ 489 (3,9%) киирэрэ быһаарыллыбыта. Ол аата быйыл сэтинньиттэн саҕалаан иккис диапозону туһанар 890 кэриҥэ дьиэ хаһаайыстыба чэпчэтиини туһанар кыахтаныа.

СӨ Ааҕар-суоттуур палаатата быһаарбытынан, ити сыалга бу сыл өрөспүүбүлүкэ хааһынатыттан 2,5 мөл. солк. көрүллэрэ наада буолар.