Уопсастыбаннай палаата төрдүс састааба үлэтин түмүктээтэ

Матвей Лыткин салайааччылаах Дьокуускай куорат Уопсастыбаннай палаататын төрдүс састааба атырдьах ыйын 1 күнүгэр үлэтин түмүктээн, үс сыллаах үлэтин отчуоттаата.
Ол курдук, 2022-2025 сылларга уопсастыбанньыктар куорат элбэх кыһалҕатын быһаарыыга кыттыыны ылан кэллилэр. Манна уопсастыбаннай тырааныспар сырыытын хаачыстыбатын тупсарыы, нэһилиэнньэҕэ табыгастаах эйгэни тэрийии, ыччат политиката, доруобуйа харыстабыла, чөл олоҕу пропагандалааһын уо.д.а. киирсэр. 
Чуолаан Куорат уопсастыбаннай палаатата арыгылаах утаҕы атыылааһыны бэрээдэктээһиҥҥэ, 1 №-дээх оптуобус сырыытын Техучастоктан ГРЭС оройуонугар диэри сөргүтүүгэ, нэһилиэнньэни эминэн хааччыйыыга, күһүн-саас куорат уулуссаларынан ыарахан уйуктаах тиэхиньикэ сырыытын хааччахтааһыҥҥа, киэһэ, түүн электро-самокатынан сырыыны бобууга быһаччы кыттыыны ылбыта.
Палаата чилиэннэрэ Улуу Кыайыы 80 сылыгар аналлаах тэрээһиннэри ыытыыга, анал байыаннай дьайыы кыттыылаахтарыгар уонна кинилэр дьиэ кэргэттэригэр көмөнү оҥорууга көхтөөх кыттыыны ылбыттара.  
СӨ Уопсастыбаннай палаататын бэрэссэдээтэлин солбуйааччы Валерий Лютай куорат уонна өрөспүүбүлүкэ палааталара салгыы даҕаны ыкса ситимнээхтик үлэлииллэригэр баҕарда. 
Куорат баһылыгын солбуйааччы – Олохтоох дьаһалта аппараатын салайааччыта Юрий Петров куорат баһылыга Евгений Григорьев аатыттан Уопсастыбаннай палаата чилиэннэригэр нэһилиэнньэни уонна былаас уорганнарын ситимниир үлэҕэ кыттыбыттарын иһин махталын биллэрдэ. Куорат дууматын аатыттан маннык тылы бэрэссэдээтэли солбуйааччы Евдокия Евсикова эттэ.
Мунньах Дьокуускай куорат Уопсастыбаннай палаататын төрдүс састаабын көхтөөх чилиэннэригэр куорат баһылыгын, Олохтоох дьаһалта, Куорат дууматын Грамоталарын, Уопсастыбннай палаата бэйэтин Грамоталарынан, Махтал суруктарын туттарыынан түмүктэннэ, диэн Олохтоох дьаһалта пресс-сулууспата иһитиннэрэр.