Уопсастыбаннай палаата 2025 сыллааҕы былаанын бигэргэттэ

Дьокуускай куорат Уопсастыбаннай палаататын үүммүт 2025 сыллааҕы үлэтин былаана нэһилиэнньэҕэ табыгастаах усулуобуйаны тэрийиигэ уонна дойдуга тапталы иитиигэ туһуланар. 
Сүрүн үлэ Кыайыы 80 сылын бэлиэтээһини кытта ситимнээх. Уопсастыбаннай палаата үбүлүөйдээх тэрээһиннэргэ кыттааччы эрэ буолбакка, бэйэтин тус көҕүлээһининэн күрэхтэри ыытар уонна бэтэрээннэри А.С. Пушкин аатынан Нуучча драмтыйаатырын «Запасной аэродром» испэктээгэр сырытыннарар былааннаах.
Култуурунай тэрээһиннэри таһынан куорат тыын кыһалҕаларын быһаарыы тумнуллубат. Чуолаан оҕо саадтарын, оскуолалары тутуу хаачыстыбатын мониторинныыр, суол өрөмүөнүн, уулусса уотун тардыы, тиэргэннэри, муниципальнай тырааныспар үлэтин тупсарыы хаачыстыбатын хонтуруоллуоҕа.
Маны сэргэ кэккэ оскуолалар салалталарын кытта баар кыһалҕалары быһаарар сыаллаах көрсүһүүлэри тэрийэр, чөл олох, патриотизм  тиэмэтигэр лиэксийэ, семинар ыытар былааннаах. Ураты болҕомто элбэх оҕолоох ыалларга, анал байыаннай дьайыы кыттыылаахтарын дьиэ кэргэттэригэр ууруллуоҕа.
Оҕо сайыҥҥы лааҕырдарыгар төрүт үгэс оҕону иитиигэ сабыдыалыгар сыһыаннаах куонкурус ыытыллыаҕа. Маҥнайгы кылаас оҕолоругар патриоттуу өйгө-санааҕа иитиигэ сыһыаннаах анал расписаниены оҥоруоҕа уонна гражданскай сэрии дьоруойдарыгар аналлаах пааматынньыгы көрүөҕэ-истиэҕэ.
Ити курдук бары былааннаммыт тэрээһиннэр нэһилиэнньэҕэ табыгастаах усулуобуйаны тэрийиигэ уонна дойдуга тапталы иитиигэ туһуланаллар, диэн иһитинэрэр Олохтоох дьаһалта пресс-сулууспата.